Oduber: Keho entrega contra dje door di Jan de Ruijter ta ridiculo

ORANJESTAD – E keho cu ex hotelero y politico Jan de Ruijter a entrega contra e.o. Minister Otmar Oduber pa e.o. fraude, corrupcion y falsificacion, (lesa e articulo riba e tema aki)  ta uno ridiculo. Esey ta e prome y unico reaccion di e mandatario na NoticiaCla.com diahuebs anochi. Mes momento Oduber ta sigura cu de Ruijter den su demanda ta gaña riba e mandatario. Entre otro riba e hecho cu Oduber no a reacciona riba e ultimo caso sumario. Segun Oduber debidamente e la apela e sentencia y lo bolbe topa Jan de Ruijter den Corte. Mes momento e mandatario a duna su prome reaccion riba e keho cu a ser entrega e.o. contra dje door di de Ruijter e siman aki serca Ministerio Publico. “Ridiculo!” tabata su reaccion riba e hecho di e keho.

 Bek pa e caso cu Oduber lo apela, e ta mustra cu den e caso anterior, segun Oduber, hues ningun momento a bisa cu e la perde e caso sino mas bien no a considere un ‘caso urgente’ pa trada den un ‘caso sumario’. Oduber, manera cu NoticiaCla.com a relata caba, a bisa cu no ta perde su tempo cu un politico ‘fracasa’ di ‘apenas 12 voto, contra su persona cu a ricibi 4008 voto durante e ultimo eleccion. “Un homber cu tabatin problema cu adicion den pasado. Mi no ta bay perde mi tempo cune” Oduber a sigui bisa NoticiaCla.com. “E ta yama su mes un ex hotelero, pero loke e ta, ta un politico. Un politico fracasa di apenas 12 voto”.