Keho entrega contra e.o. tres minister di gabinete Mike Eman 2

ORANJESTAD – No menos cu tres (3) minister a haya un keho entrega contra nan e siman aki, cu ta varia di corupcion, fraude, valsheid in geschrifte, y cu peticion pa persigui nan penalmente. Ta trata di ministernan Otmar Oduber, Benny Sevinger y Mike Eman. E denuncia mes a wordo haci pa ex hotelero Jan de Ruijter dia 2 di december ultimo, y tin di haber cu e proyecto di ex Hotel Bushiri hotel, y su posibel transformacion den loke mester a bira Hard Rock hotel. Ministerio Publico pa medio di su vocero, Ann Angela a confirma e denuncia aki na NoticiaCla.com diahuebs atardi. “Nos ta confirma cu nos a haya un aangifte di de Ruijter contra e minister” Angela a bisa, refiriendo na minister Oduber, riba e pregunta di NoticiaCla.com. Ora cu a ricibi e keho mes for di de Ruyter, a nota cu tin dos minister mas. Riba e loke cu Ministerio Publico ta bay haci awo, ta depende di e Fiscal Mayor. “E fiscal mayor ta bay studi’e y lo tuma un decision con lo sigui”, Angela a sigui bisa. Riba e contenido nan no kier a bisa nada, aunke nan a confirma cu e keho a keda publica caba, pues e ta publico caba.

Manera NoticiaCla.com a bisa, e keho ta entre otro contra tres minister. Esey kier men cu tin tambe un cantidad di otro persona cu ta wordo menciona den e keho, cu ta varia di miembro di e comision di evaluacion di e proyecto Hard Rock, Directiva di e compania Malmok Property Mgmt, director di Southwest Development Horeca, directiva di Aruba Investment Bank, su hunta di directiva, y mas instancia, incluyendo propio director di Hard Rock Hotel.

Gran parti di e keho ta rond di e garantia pa e proyecto, cu supuestamente lo no a wordo procesa corectamente, y e supuestamente a wordo ‘manipula’ door di e minister di turismo. E keho ta uno extenso, den forma di un carta, unda cu e denunciante ta relata punto pa punto, kico esnan acusa, a haci y pakico nan ta culpabel segun e denunciante. E hecho cu despues di un caso sumario recien riba e topico di corupcion contra solamente minister Oduber, e mandatario lo a opta pa no apela e sentencia, ta mustra, segun e denunciante de Ruijter, cu e mandatario ta admiti su culpabilidad. For di e sentencia ey, a bin sali na cla cu no ta problema pa e denunciante sigui cataloga e mandatario como ‘un persona corupto’.

NoticiaCla.com a compronde di algun di e personanan cu ta riba e lista, cu nan no ta considera e denunciante como un hende serio, y algun a te hasta yame pa loco. Intento pa haya reaccion di por lo menos un di e mandatarionan, no a logra tampoco. Den pasado, ta conoci cu e mandatario cu ta mas ‘envolvi’ cu e proyecto, Otmar Oduber, no ta duna e denunciante mucho atencion, pasobra e no ta considere uno persona serio. E la indica cu e denunciante ta riba un ‘mision’ pa destrui e mandatario debi cu e denunciante no a wordo recompensa cu un trabou den gobierno ora cu Oduber a asumi su funcion di mandatario na 2009. Lesa e keho completo di denunciante de Ruijter aki ).