Gobierno a cambia di opinion y ta introduci cambio fiscal toch pa 2020

ORANJESTAD – Algun ora despues di anuncia publicamente cu no ta introduci cambionan di reforma fiscal na cambio di aña 2020, Gobierno di Aruba a dicidi toch pa introduci cambio  valido pa 1 di januari 2020.  “Minister di Finanzas (Xiomara Maduro)  a dicidi di toch evalua pa anuncia e partinan positivo di Reforma Fiscal. Dus tariefsverlaging” Wever a bisa e portal aki diahuebs anochi. Diahuebs mainta ainda, el a sigura den conferencia di prensa cu no a keda cla pa introduci e fase 2 di reforma fiscal. Pero anochi, cos a cambia. 

DETAYE

Den curso di dia, lo tin mas informacion ora cu e anuncio official tuma lugar. E mandatario a confirma na e portal aki cu enberdad el a bisa cu nada di reforma fiscal ta drenta na vigor 1 di januari 2020. “ Pero e tariefsverlaging cu ta den voordeel di tur burgers si por wordo anuncia y e ley ta cambia despues cu terugwerkende kracht” Wever a sigui bisa. 

DIAHUEBS MAINTA

Tabata diahuebs mainta cu durante e conferencia di prensa, e portal aki a puntra e mandatario pa clarifica e asunto mirando cu tin gremionan commercial cu ta preocupa cu nan lo haya sorpresa atrobe ora aña bolter, cu cambionan fiscal. Aki Wever a contesta e portal cu “Gobierno no a logra keda cla cu e fase 2 di reforma fiscal y cu como tal lo no introduci ningun cambio di reforma fiscal pa januari 2020”. A bisa tambe e momento ey cu e unico cambionan ta esnan cu a keda pasa diaranson, cambio riba e.o. winstbelasting. Apenas algun ora despues, cos a cambia atrobe.