Wever: Huramentacion di e minister y parlamentario nobo no ta garantisa prome cu 2020

ORANJESTAD – Contrario na declaracion di premier Evelyn Wever Croes na noticiacla.com un siman pasa cu lo huramenta Marisol Lopez Tromp y Dellanire Maduro prome cu reces di Parlamento, esaki lo no tuma lugar mas. Por lo menos, esaki no ta mustra di ta e caso. Wever Croes no por a duna garantia na NoticiaCla.com diahuebs mainta cu prome cu final di 2019, e cambio den gabinete Wever y Parlamento lo tuma lugar. Entre nan, huramentacion di Marisol Lopez Tromp y Dellanire Maduro como minister y parlamentario nobo respectivamente. Fuera di esey, tin e cambio necesario den seno di partido MEP, unda cu un parlamentario a retira y un otro miembro tin cu drenta. Tur esey tambe ta pendiente. Premier Wever a bisa noticiacla.com cu no tin pura cu esaki y cu tin otro prioridad awor. Ta atendiendo cu e ‘geloofsbrieven’ y asina cu e proceso ta cla, lo pasa pa e cambio manera cu a priminti. 

CAMBIO

Tabata na September ultimo cu Otmar Oduber a anuncia su retiro como minister, vigente pa 12 di December ultimo. Esaki a crea un vacatura unda cu colega di partido POR Marisol Lopez ta bira su reemplasante.