Wever: Prome cu reces, lo huramenta minister y parlamentario nobo

ORANJESTAD – Minister Glenbert Croes diamars a bay den cuarentena preventivo diamars, despues cu a tuma nota cu un consehero di Departamento di Progreso Laboral (DPL) a test positivo pa COVID-19. E consehero tabata cerca e minister den oficina siman pasa ainda pues a dicidi pa tur precaucion, pa e tuma e medida aki. Mes momento e minister a manda tur hende di e departamento cas pa cuarentena. Asina e mandatario a confirma riba su pagina di Facebook. DPL y FASE lo keda activo online. “Tur hende lo keda traha for di cas”, e mandatario a sigui bisa. E persona cu a keda contagia ta entre e 5 nan cu ta contagia localmente. Entre dialuna y diamars, Aruba a conoce un aumento di 10 caso positivo, tur contagion local. 

ORANJESTAD - Gobierno di Aruba diamars mainta a manda un mensahe urgiendo fuertemente pa tur persona bisti un mondkap of shield ora di haci uzo di medionan di transporte publico. Mientrastanto durante conferencia di prensa di un grupo di chauffeur di autobus, nan a bisa cu ta obligatorio pa tur pasahero di autobus, tin un mondkapje bisti. Esnan cu no tin, por cumpra esaki pa 1 florin cerca e chauffeur (si e tin disponibel). Pa loke ta gobierno, nan ta referi specificamente ora di uza bus, autobus, taxi y tour vehicles. “Ta di sumo importancia pa uza e mondkap of shield na lugarnan publico unda cu no por mantene un distancia social di 1.5 meter, esaki pa propio prevencion y como tambe pa siguridad di otronan”. Potret cortesia Mas Noticia. 

ORANJESTAD – E reunion di Parlamento cu a tuma lugar diabierna ultimo unda cu mester a atende cu e ‘confiansa of no contra e minister’, a para abruptamente diabierna anochi riba peticion di partido POR. E reunion no por continua, si e minister no tey. Por lo menos esey ta e opinion di premier Evelyn Wever Croes. Asina e la bisa durante un conferencia di prensa dialuna mainta. “Mi ta haya cu e tweede ronde mester bay ora cu e minister tey” e mandatario a bisa. E ta na altura cu tur fraccion den Parlamento a bisa cu nan kier pa e reunion continua tambe. 

ORANJESTAD – Si resulta cu minister Marisol Lopez Tromp retira di su function (voluntariamente) of e wordo retira (door di Parlamento) y bin un vacatura di e respectivo ministerionan, no ta bay  bin un di 8 minister bek. Esaki ta e posicion di partido MEP, segun su lider Evelyn Wever Croes na e portal aki dialuna mainta durante un conferencia di prensa. “Ta keda goberna cu 7 minister” e mandatario a sigui bisa. E motibo ta gastonan extra. 

ORANJESTAD – Durante un conferencia di prensa dialuna, despues di 7 luna di ta keto, ex lider di partido POR Otmar Oduber a dicidi di clarifica y mas bien desmenti tur acusacion cu tin den su contra, particularmente relaciona cu e presentacion recien di actual minister Marisol Lopez Tromp den Parlamento. Un pa un, pa mas di un ora, y varios biaha cu documento pa mustra esaki, Oduber tabata repasa e lista di loke e ta yama ‘mentira y insinuacionan’ cu Lopez Tromp a lansa diabierna ultimo y prome den su direccion. Dado momento e la compara su ex colega di partido cu un actor di e organisacion teatral Mascaruba, elogiando Lopez Tromp cu e un bon actor.  

ORANJESTAD – “Ora cu bo ta papia di corupcion y bo ta papia di integridad, mi no ta kere bo por traha cu partido AVP”. Asina Evelyn Wever Croes den su calidad di lider di partido MEP a declara dialuna mainta durante un conferencia di prensa di gobierno. “Mi ta considera partido AVP un Universidad di corupcion” Wever Croes a sigui bisa. Ora cu e portal aki a puntre si e ta bisa esaki como cabez di gobierno, el a bisa cu no, cu e ta bisa esaki como opinion personal y lider di partido MEP. “Mi no ta kere cu ami lo lidera un partido cu ta traha cu partido AVP”. Segun Wever Croes, dia cu MEP traha cu partido AVP, ta ora cu e no ta lider mas di e partido geel. “Mi tin cu bisa tambe cu mi no a bin pa hopi tempo. Mi tin 10 aña den politica caba, y ta yega un momento cu mi ta cuminsa pensa. Pero traha cu partido AVP no ta riba mi lista” Wever a bisa cu hopi siguransa. E contesta ta basa riba pregunta di un periodista cu a puntra kico e ta pensa di traha of forma un posibel gobierno cu partido AVP.