Bosman: Aruba kier coregi presupuesto cu palabracionan ‘suave’

DEN HAAG/ORANJESTAD – E forma con gobierno di Aruba kier coregi e presupuesto 2020 segun representante di partido VVD den Tweede Kamer Andre Bosman, ta haciendo palabracionan ‘suave’. Asina e parlamentario ta reacciona riba preguntanan di noticiacla basa riba su ultimo declaracion haci. Recientemente e portal aki a papia cu e parlamentario riba e reunion cu premier Evelyn Wever Croes a tene cu e comision di Tweede Kamer na Hulanda unda cu Bosman tabata participe. Y basa riba su contestanan, e portal aki a hacie un serie di pregunta mas, y awe Bosman a contesta esakinan. 

TRATAMENTO CORTO DI PRESUPUESTO

Bosman den su ultimo combersacion cu e portal aki a bisa cu e tratamento di e prepuesto 2020 di e gobierno aki (di Aruba), lo bira uno ‘cortico’. Clarificando esaki riba peticion di e portal aki, Bosman ta bisa cu e kier men cu e ta nota cu atrobe riba e dossier di asuntonan di personal, no tin progreso. Tambe e presupuesto ta laat atrobe y cu e cambionan ta basa riba palabracion ‘suave’. 

ARUBA NO TA KEDA CLA

E hecho cu e aanwijzing a wordo ‘wanta’ atrobe, ta pa duna Aruba un chens pa drecha su asuntonan atrobe, manera cu ambos gobierno a bisa. A puntra Bosman si esaki ta meramente un ‘posponemento di ehecucion’ of un chens real di gobierno Hulandes pa cu Aruba. “Mi no ta kere cu Aruba lo traha suficiente y cu nan lo no logra cera e presupuesto di e forma corecto” Bosman a sigui bisa.

PLACA PA ARUBA

Bosman den su declaracion a bisa cu si ta pa VVD, ningun placa ta bay pa Aruba. Riba esaki e portal aki a mustra y recorda Bosman cu contrario na Corsou p.e., Aruba no a haya ‘kwijtschelding’ di su debenan y no a haya placa di Hulanda, sino mas bien ayudo ‘tecnico’, pues su declaracion no ta cuadra. Bosman su pensamento ta cu e tabata referi na ‘prestamo’, pues e ayudo di Hulanda pa Aruba haya prestamo bentahoso.  

POLARISACION CU HULANDA

Bosman ta bisa cu debi na e polarisacion fuerte cu Hulanda, Aruba no ta logra bin cu solucion. Y mustrando Hulanda como esun culpable, e no ta resolve nada, pasobra ‘No ta e responsabilidad di Hulanda’. Loke cu Bosman kier men, segun su reaccion, ta cu e gobierno aki ta sinta 2 aña caba y no por culpa otro hende mas pa e problemanan. Segun Bosman, mientras cu no ta awor, pero den pasado si e gobierno aki (lesa Evelyn Wever Croes) tabata duna Hulanda e culpa cu cos tabata malo.