Bosman: Si ta pa partido VVD, Aruba no ta haya ‘prestamo suave’

DEN HAAG – Si ta partido Volkspartij voor Vrijheid en Democratie (VVD), Aruba no ta haya un prestamo beneficioso. Asina e vocero di e partido den Tweede Kamer na Hulanda, Andre Bosman a bisa noticiacla.com diabierna mainta. “Si ta pa VVD, Hulanda lo no yuda Aruba cu placa y tampoco un ‘zachte lening’” Bosman ta bisa entre otro. E ta considera e combersacion cu premier Wever e siman aki como uno ‘habri’ y cu di su banda el a haya e oportunidad pa comparti su ‘preocupacion’. 

AANWIJZING

E parlamentario Hulandes a admiti cu e ta pro pa gobierno di Aruba haya un aanwijzing awe diabierna. Pero manera ta conoci, Rijksministerraad a dicidi otro. E portal aki a puntra e parlamentario pakico e ta haya cu Aruba merece un aanwijzing. “Mi a indica (na Wever) cu atrobe mi no por mira con ta bayendo cu Aruba” Bosman a bisa. “E presupuesto no tey atrobe, y como tal CAFt no por husge. Y e tratamento (di e presupuesto) ta bira uno cortico atrobe. Finanzas duradero no ta na ordo y no ta bay ta na ordo pasobra e gobierno aki tampoco (compara cu gobierno anterior) no ta sigui dilanti”, Bosman a sigui bisa. Ora cu a puntra Bosman si esey ta pensamento di partido of di dje personalmente, el a bisa, cu e ta vocero di e partido VVD, y como tal e ta representa VVD.  

CAFT Y HULANDA TA TRATA ARUBA SUAVE

Tin e pensamento cu CAFt y gobierno di Hulanda ta trata Aruba su gobierno cu un handschoen di felpa, compara cu e otro islanan y pesey no a haya aanwijzing ‘ainda’. A puntra Bosman si e ta di acuerdo cu e ponencia aki.  “Finanzas ta keda un responsabilidad di e islanan (manera Aruba). Nan mes mester scohe pa e solucion. Cada gobierno ta indica cu nan kier tuma paso, pero esaki nunca ta bira realidad. Pesey (mi ta haya cu) mester bin un aanwijzing (awor)” Bosman a contesta. 

ARUBA NO TA HAYA AANWIJZING

E portal a puntra Bosman cu si Aruba no haya e aanwijzing awe diabierna (a puntra e parlamentario esaki un dia prome cu RMR mester a dicidi riba e aanwijzing), cu si esey ta confirma e pensamento cu Hulanda ta anda mucho ‘suave’ cu Aruba y cu como tal Hulanda mes lo ta responsabel si cos bay malo na Aruba. Esaki pasobra CAFt den pasado tampoco kier a tuma medida, y e situacion a empeora. Pero CAFt mes momento a sigura cu e hecho cu cos a empeora, no ta falta di CAFt den e pensamento cu nan lo no a tuma medida suficiente. Riba tur esaki Bosman a mustra cu Hulanda no ta un partner, sino Reino Hulandes. “Y si cos bay malo cu Aruba, esey no ta responsabilidad di Hulanda. Y si ta pa VVD, lo no tin cen cu ta bay pa Aruba, y tampoco un asina yama ‘zachte lening” Bosman a sigui bisa. Riba su mes, un declaracion interesante mirando cu Hulanda no a duna Aruba placa, sino mas bien duna ayudo tecnico solamente. 

RELACION CU HULANDA

FInalmente e portal aki a puntra Bosman, con e ta haya e relacion entre Aruba y Hulanda riba nivel gubernamental y parlamentario. Segun Bosman, debi na e polarisacion fuerte, Aruba no ta logra haya solucionan. “Y door di apunta e dede riba Hulanda como e ‘culpabel’ di e problemanan na Aruba, e situacion no ta drecha. Esaki pasobra esaki nunca ta responsabilidad di Hulanda” Bosman a finalisa bisando. 

CRITICO

Mester bisa acerca cu semper Bosman tabata hopi critico pa cu e islanan aki y cu semper el a boga pa nos islanan para riba nan mes, y no forma parti di Hulanda. De hecho a sugeri pa cambia statuut tambe pa asina cambia e relacion entre e paisnan den Reino Hulandes.