Desaroyador Hulandes ‘no tabata sa’ cu no por exporta santo di Aruba

GRONINGEN – Si no por haya santo di Aruba, ta busk’e otro caminda. Asina e desaroyador Hulandes Henk van Meekeren a bisa riba e asunto di exporta santo di Aruba pa Hulanda. Minister di infrastructura Otmar Oduber a informa e portal aki noticiacla.com cu e ‘flie’ ey no ta subi y cu no ta permiti exportacion di santo blanco di Aruba pa exterior. Segun e desaroyador Hulandes, e por hari pa e conmocion cu a surgi. (Ora cu e portal aki a publica e noticia inicial recientemente).  “E tabata un idea. Bo tin cu bisa algo, y ta bira conoci hopi liher si e (idea) ta realisabel of no”. “Pero mi no ta wak pakico e mester ta un problema. Tin suficiente santo riba e isla. Nan lo no ripara (mes) si un barco cu santo sali pa Hulanda” e comerciante ta sigui bisa.

ALTERNATIVA

E desaroyador a reserve 110.000 euro pa importacion di santo. Pero si no por hacie for di Aruba, lo busk’e di otro caminda. “Mi no a profundisa mi mes den ley. Mi lo busk’e for di Torremolinos (parti sur di Spaña na Andalucia). E ora e no ta bira santo blanco sino color di oro geel”. 

PREMATURO

E plannan pa e hotel cu beach ta den un estado hopi premature. Van Meekeren ainda mester haci e estudio ecologico, y despues presenta su plannan na municipio di Groningen. Si esakinan keda aproba, por cuminsa cu e construccion. Esey ta premira di ta den e di tres cuartal di 2020.