Tweede Kamer kier clarificacion riba declaracion di Premier Wever di un entrevista recien

DEN HAAG – E comision permanente di Tweede Kamer di Hulanda kier clarificacion di Secretario di Estado, Raymond Knops, riba un declaracion recien haci di Prome Minister di Aruba, Evelyn Wever Croes, durante un entrevista cu NoticiaCla LIVE. Como tal nan a manda un carta pa Knops pa esaki.  Nan kier e clarificacion riba e articulo di e matutino Antiliaans Dagblad na Corsou riba e tema. Den e carta fecha 24 di october 2019, nan ta referi na e articulo, cu a cita parti di un programa di NoticiaCla LIVE, unda cu e mandatario lo a haci e declaracionnan. E declaracionnan aki no a cay den bon tera na Hulanda, y awor nan kier reaccion di e mandatario y a exigi esaki pa mas tarda 8 di november proximo. 

E PROGRAMA

Tabata na medio october cu Wever a aparece den e programa NoticiaCla LIVE cu moderador Tito Laclé, unda e mandatario a contesta e preguntanan riba e.o. e tema di relaciona entre Aruba y Hulanda. Aki a puntra e mandatario riba e aspecto di constitucion, mirando cu na Aruba constantemente e parlamentarionan (di MEP) ta bisa cu Hulanda ta actua contra constitucion, y den e caso mas recien, e aspectonan di CAFt. Den e programa, Wever a admiti cu no obstante constitucionalmente algo no por, experiencia cu Hulanda ta bisa otro si y no a stroba Hulanda di actua no segun constitucion. “Esey bo tin rason”, Wever a bisa NoticiaCla riba e pregunta di Laclé, cu no obstante algo ta mara den ley, cu e cosnan por bay otro. E matutino na Corsou a coy e programa y a skirbi cu Wever a bisa cu: ‘ora cu bo ta deal cu e ministernan Hulandes, nunca bo no sa (kico por pasa), pasobra nan no semper ta tene nan mes na margen di ley’. Mientras cu e pensamento ta mescos, e matutino a uza otro palabra y structura, creando e situacion cu a surgi aworaki. E comision no a aprecia e declaracion ey manera cu el a sali den e matutino y awor kier un aclareacion di e mandatario. Lesa e carta AKI.