Wever: Aanwijzing no kier men cu ta hala gobierno di Aruba un banda

ORANJESTAD – Si gobierno di Aruba haya un aanwijzing, esey no ta nifica cu Hulanda ta hala prome minister di Aruba for di su stul, y ta cuminsa goberna. Asina prome minister Evelyn Wever a bisa den e programa Noticiacla LIVE. Segun Wever, pa esey sosode,  e situacion mester ta hopi mas pio cu e ta awor. “Esey no ta bay pasa na Aruba” Wever a sigura e portal aki. “E no a pasa tempo di gobierno anterior ora cu tabatin hopi mas motibo” Wever a sigui bisa, argumentando cu si e tempo ey no a hacie, e lo no sosode awor. Ademas, Hulanda no por haci esey segun constitucion. 

PERCEPCION

E pregunta a bin a base di e percepcion cu tin den comunidad cu ta pensa cu ora cu bin un aanwijzing, Hulanda ta tuma gobierno over. El a pasa si na p.e. St Eustatius, unda cu nan a hala e gobierno elegi y a pone un hende apunta pa Hulanda. Pa loke ta na Aruba, Hulanda no por haci esey tampoco constitucionalmente segun Wever. Di otro banda, Wever a admiti cu no obstante constitucionalmente algo no por, experiencia cu Hulanda ta bisa otro si y no a stroba Hulanda di actua no segun constitucion. “Esey bo tin razon”, Wever a bisa noticiacla riba e ponencia cu no obstante algo ta mara den ley, cu cosnan por bay otro. 

AANWIJZING

Segun e concepto di e aanwijzing cu Hulanda a manda pa Aruba, ta mustra cu si Aruba haya e aanwijzing, e lo ta pa gobierno di Aruba haya un ‘orden’, of un ‘instruccion’ pa hinca e sociaal crisis plan den e presupuesto. “Si bin e aanwijzing pa hacie, mi ta hacie, pero e sociaal crisis plan ta keda existi. Mi mester atende cu e crisis” Wever a bisa. Problema ta bira e ora cu e acto ey ta hinca Aruba den un otro problema, unda cu Aruba e ora por haya un otro aanwijzing pasobra e ora no ta cumpliendo cu e protocol.  cu gobierno di Hulanda a manda A mustra como ehempel, e forza y e peso di un aanwijzing compara esun di Corsou recientemente. Segun Wever, e aanwijzing di Corsou ta uno ‘light’ compara cu nan a haya na 2012. Esey di 2012 a mara e gobierno di turno na Corsou e tempo ey. Di Aruba tambe lo ta uno ‘light’ den pensamento di Wever. Esey ta, si Aruba haya e aanwijzing. E ta riba agenda pa diabierna awor, aunke cu gobierno di Aruba a haci peticion pa pospone e tratamento te e proximo RMR cu ta 22 di November proximo.