Crisis financiero/constitucional ta continua na Aruba

ORANJESTAD – Pa esnan cu kier e ultimo version di e situacion di crisis actual (constitutional y financiero) ,gobierno di Aruba a yama un conferencia di prensa pa dialuna mainta pa esaki. Premier Mike Eman ketobay ta den su welga di hamber (dia 3) mientras cu dos parlamentario di partido AVP (Desiree Croes y Clarisca Velazquez) tambe a cuminsa cu nan welga di hamber. Y un campaña pa colecta firma contra e acto di gobernador, a inicia. Mei mei di esaki, un sin fin di documentacion a aparece riba internet, y parti riba e.o. social media.

Tur esten, ainda no tin ningun reaccion oficial di parti di gobierno di Hulanda, riba entre otro e welga di hamber di Premier Eman y e protesta cu tin contra gobernador di Aruba. Mes momento, gobierno di Aruba a traha ‘tras di cortina’ manera cu NoticiaCla a raporta caba, pa asina genera otro tipo di reaccion indirecto. Y un di e resultadonan ta cu segun gobierno di Aruba, e miembronan di Parlamento (Tweede Kamer) di Hulanda, esta Alexander Pechtold y Wassila Hachchi di e Fraccion di D66, hunto cu Sybrand van Haersma Buma y Madeleine van Toorenburg di CDA a lansa un cantidad di pregunta segun gobierno, bastante fuerte den direccion di Prome Minister Mark Rutte y Minister Ronald Plasterk di Binnenlandse Zaken en Koninkrijksrelaties. E preguntanan a sali den fin di siman y ta relaciona directamente cu e crisis constitucional cu Aruba y e welga di hamber di Minister Presidente mr. Mike Eman.

E noticia di fin di siman na Aruba, tabata e avalancha di documentacion riba e tema di crisis. E pelicula cu titulo ‘He said, She said’ di 1991 cu Kevin Bacon y Elizabeth Perkins ta bin na mente, refiriendo na un pelicula unda cu dos persona ta papia di algo segun nan version y ningun hende ta bira mas sabi di e asunto. Solamente cu enbes mester cambia e titulo den ‘He said, He said”, y e actornan ta Premiernan Mike Eman y Mark Rutte, y tambe Juan David y Ronald Plasterk. Loke cu hopi ta cuestiona, ta kico ‘e acuerdo’ ta papia ta di februari, y pakico tin un silencio riba e asunto aki.

Di parti di gobierno, NoticiaCla a compronde cu no tin ningun acuerdo, sino meramente un intercambio di corespondencia. “Ta Hulanda a interpreta esaki como e acuerdo y a pone esaki asina” e persona yega na premier Eman a confirma na NoticiaCla. Di otro banda, tin un carta di minister Plasterk, cu ta papia otro cos. Aki Plasterk ta sigura cu tin un acuerdo y cu Aruba tin cu simplemente cumpli cu esaki y no tin awa pa laba.

Un otro debate ta si enberdad tabatin ‘sugerencia di IMF’ y cu si Juan David Yrausquin no kier a ‘implementa esaki’. E debate ta cu Yrausquin lo ta desmintiendo cu gobierno di Aruba no ta di acuerdo cu IMF, siendo cu tin un protocol firma di maart 2013, cu ta mustra claramente cu tanto Aruba y Hulanda a aproba esaki y a pone como condicion. Como tal, Hulanda ta teniendo Aruba tambe na e acuerdo aki den su ‘aanwijzing’. Esaki de hecho a resulta un punto hopi importante cu Hulanda ta basa su mes ariba, y cu Aruba tambe a aproba anja pasa. 

Y finalmente, e discusion cu si Premier Rutte of Eman ta papia berdad riba e acuerdo di 3 di July 2014, cu si ta College Financieel Toezicht so mester a bin of no. Rutte ta bisa cu si, manera cu fuente di NoticiaCla a raporta caba, y Eman a sigura NoticiaCla na 2 instancia caba, cu no ta asina. Mientrastanto dialuna ta habri, cu Rey Willem Alexander firmando e Koninklijk Besluit, pa despues gobernador di Aruba habri porta pa secretariado di CFT haci su entrada na Aruba y cuminsa investiga e presupuesto 2014.