Pasenshi di Hulanda ta cabando cu Aruba

ORANJESTAD – Faltando un dia prome cu Conseho di Minister di Reino tene su ultimo reunion prome cu recess, ainda no tin un comision instala pa investiga e presupuesto 2014. Diaranson premier Mike Eman a informa publicamente cu di parti di Aruba a manda nombernan di esnan cu Aruba kier den e comision, y ta wardando esunnan di Hulanda.

NoticiaCla a confirma, cu e hecho cu Premier Eman ta nengando rotundamente cu comision di CFT lo ta esun cu ta investiga e presupuesto, no a cay den bon tera na Hulanda. De hecho, for di Hulanda Premier hulandes Mark Rutte lo a atende Eman riba e asunto aki y a mustra cu e tin cu stop di nenga e acuerdo aki, pasobra e mes a acorda esaki cu Hulanda un siman pasa.

Loke tin Hulanda (lesa: Rutte) disgusta ta cu e asunto ta tardando y e tin e investigacion tranca. Y un trancamento di e investigacion, ta pone Aruba den un luz mas negativo ainda, cu consecuencia cu e por desemboca ainda den un ‘aanwijzing’. E aanwijzing tabata bari for di mesa, cu e condicion cu Aruba lo a bay di acuerdo pa somete su presupuesto na un investigacion pa e comision. Un siman despues, ainda no tin comision, te pa nan conduci e investigacion. Tur esaki mientras cu for di dialuna CFT tabata buscando informacion sin por haya esaki.

Un di e problemanan ta cu no tin un ‘acuerdo’ otro cu e declaracion mutuo riba papel cu tanto Hulanda y Aruba a emiti un siman pasa. Investigacion cu NoticiaCla a haci, ta mustra cu enberdad no tin nada di acuerdo, riba papel, den un forma di un protocol, sino solamente e acuerdo den forma di un ‘comunicado’. “Esey tin, y esey ta loke nos sa”, ta loke representante di Minister hulandes a bisa NoticiaCla for di Hulanda e siman aki.