SIMAR: Carta di minister tabata mal skibi cu a causa conmocion

ORANJESTAD – E carta cu minister di enseñansa Rudy Lampe a manda siman pasa pa enseñansa anunciando cierto ‘maneho nobo’, tabata simplemente mal skibi cu a causa conmocion innecesario. Asina e presidente di Simar Josephine Albertus a bisa NoticiaCla.com dialuna despues di su reunion cu e mandatario. Albertus a reuni dialuna merdia cu e mandatario pa haya aclariacion di Lampe, ya cu e carta a causa basta disgusto, tambe cerca Albertus y miembronan di e sindicato. Mientrastanto cos a ‘trankilisa’ y si no tin sorpresa mas, no tin necesidad pa un accion segun Albertus.  

PANICO

E carta mal skibi segun Albertus, a pone cu hendenan den enseñansa a drenta un panico innecesario, pero no pa nan falta sino pa falta di minister mes. Si e carta tabata diferente skibi, esaki lo no a sosode segun Albertus. Mes momento a bisa cu despues di e reunion, hopi cos a keda ‘aclarea’, cu ta pone cu no ta kere cu mester pensa mas den un of otro accion di rabia. 

KICO A PASA

Mientras cu segun Albertus, Lampe no a admiti ningun momento cu e carta tabata mal skibisi, e carta a ‘simplemente wordo mal interpreta’. Algo cu Lampe a bisa tambe den su conferencia di prensa. Segun Lampe, ta prensa a coi e carta y haci storia cune siendo cu no ta berdad loke cu e lo a bisa. Albertus a bisa e mandatario riba esey cu otro biaha e (e mandatario) tin cu ‘formula’ e carta miho. Esaki pasobra contrario na e mandatario su ‘splicacion’, ningun momento den e carta ta papia di ‘excepcion pa cierto docentenan haya overtime paga, manera di Wiskunde’, y otro vaknan cu lo haya aprobacion. E carta tabata bisa bon cla cu ‘no ta duna mas overtime per direct’. Pues e palabranan ey, no ta prensa a malinterpreta nan, sino mas bien e carta su contenido tabata ‘fout skibi’. Den un conferencia di prensa diamars, SIMAR lo bay den detayes di kico tur e mandatario a ‘purba’ clarifica y con el a purba ‘suavisa’ e situacion. Potret ta screenshot di conferencia di prensa, cortesia Gabinete Wever Croes.