Minister a para tur overtime den enseñansa ‘per direct’

ORANJESTAD – Un medida cu ta drenta na vigor ‘per direct’, den enseñansa ta cu gobierno no ta paga overtime mas na docentenan y nan asistente. Den un carta fecha 24 di juli 2019 cu ta den poder di NoticiaCla.com, e mandatario di enseñansa Rudy Lampe ta anuncia algun medida cu por trece problema den seno di enseñansa y crea un impasse pa ora cu scol habri aki dos siman. Esaki pasobra e regla nobo ta viola e  palabracion haci na comienso di vacantie di gobierno na docentenan cu a protesta algun siman atras, cu lo no haci ningun cambio durante vacantie grandi riba tereno di enseñansa. 

E CARTA

E carta aki, cu ta inclui un cantidad di medida fuera di e paro inmediato di overtime, ta bisa tambe cu e asina yama pago pa vacantie no usa debi na malesa (AO), ta wordo para tambe ‘per direct’. 

MOTIBO CAFT

Gobierno (lesa: minister Rudy Lampe) ta ‘culpa’ gobierno di Reino Hulandes y e colegio di supervision financiero di Aruba (CAFt). E carta su prome frase ta cuminsa na bisa cu ta gobierno di Reino Hulandes y e colegio di supervision financiero a confronta gobierno di Aruba ‘atrobe’ cu e ‘realidad di e disciplina di presupuesto’.  Como tal, e mandatario responsabel pa enseñansa a dicidi cu tin cu ‘optimalisa’ e maneho di subsidio. Segun e mandatario, esaki no por sosode sin sosten di e directivanan di scol, DPS, Directie Onderwijs y Dienst Inspectie Onderwijs. 

MANEHO DI SUBSIDIO

E intencion ta pa ancra e maneho nobo di subsidio den un buki di maneho. Pero anticipando esaki, y mirando e limitacion presupuestario, Lampe ta bisa cu ta necesario y urgente pa implementa e medidanan mesora pa por maneha e subsidio di personal y gastonan di personal. Cu bista riba esey, ta introduci tres regla mesora, esta per direct, den cual ta figura esun di paro di tur pago di overtime. 

REGLANAN

E prome regla implementa, ta bisa cu e cantidad di docentenan full time cu ta wordo subsidia, ta a base di un klas di 28 alumno, den base regular, y pa scol secundario, klasnandi 24 alumno. E siguiente regla ta toca e asina yama taak uren osea funcionan extra cu e docentenan tin cu eherce, ta wordo limita na maximo 1/8 parti di e total pa docente. Ademas tin e paro di overtime, pa tanto docente como esnan cu ta asisti e docente. “Overtime no ta wordo presupuesta, y como tal ta wordo mira como cosnan cu ta ‘surpasa’ e presupuesto di pais Aruba. Y como tal, esaki no ta wordo permiti. 

REACCION Y CONSECUENCIA

E reaccion di docentenan tabata hopi diabierna caba, y a mustra cu nan no ta nada contento cu e decision aki y cu por spera problema na comienso di aña escolar. E presidente di sindicato di maestro SIMAR, Josephine Albertus a bisa recientemente ainda den e programa NoticiaCLa LIVE cu e palabracion ta cu ningun cambio den enseñansa por tuma lugar durante periodo di vacacion escolar, sino docentenan lo ta para dilanti porta di Bestuurskantoor ora cu aña escolar habri. Y e carta aki ta un motibo suficiente pa e docentenan haci netamente esey. Ya caba ta tendiendo grito di docentenan diabierna cu a laga sa cu esaki no ta keda aki y cu nan lo tuma accion. Lesa e carta completo AKI.