Minister ta sigui kere cu Watty Vos Blvd lo keda cla laat

ORANJESTAD – E proyecto di Watty Vos Boulevard lo no keda cla pa augustus 2019, manera programa. Por lo menos segun minister encarga cu infrastructura Otmar Oduber. Asina el a confirma na NoticiaCla diamars. Cu esaki, e ta ratifica e declaracion aki cu el a haci algun luna atras caba na e portal aki na maart di e aña aki, esta cu e no ta kere cu e trabounan lo keda cla manera planea. E mandatario alavez a confia na e portal aki cu ta haciendo intento pa responsabilisa e contratista segun contracto. 

 TARDANSA

E mandatario ta kere cu e trabounan principal (y no e parti di acabado, landscaping) lo dura por lo menos 3 luna mas. E la laga sa tambe cu e no ta nada contento cu e planificacion haci te awo y pues a bolbe pidi DOW, Grant Thornton y PwC Ned adviesnan pa pone e contratista responsabel segun e contract malo firma na 2015. Si esaki ta desemboca den multa mas halto, no ta confirma pero si cu si pa augustus 2019 no keda cla, esaki por bira un batata cayente financiero pa e compania responsabel Mota Engil. 

CONTRACTO

Segun contracto cu e compania tin cu gobierno, mas tarda augustus 2019 e trabounan principal mester ta completa, mientras cu pa fin di aña e parti di landscaping, acabados di e.o. e rotondenan, mester ta completa. Hunto cu esey, tin cierto partinan cu a dicidi caba cu ta cay for di e trabou principal y tambe por keda cla pa fin di aña. Tin un criteria cu ta usa pa determina cua di e facetanan ta haya e ‘luz berde’ pa keda cla mas laat. Entre nan, a determina cu e parti di e rotonde na Fermins Bar tambe ta haya un ‘pass’ pa pasa pa December. Pero tur otro trabou grandi, mester ta completa pa augustus. Algo cu e mandatario, responsabel pa e tipo di trabounan aki, mes no ta kere cu lo ta e caso aworaki.