Minister mes tin duda cu Watty Vos Blvd lo ta cla na tempo

ORANJESTAD – Situacion di trafico na Aruba ta bay solamente bira mas pio den e proximo lunanan. Asina e minister di infrastructura Otmar Oduber a confirma durante un conferencia di prensa diahuebs mainta. Tabata NoticiaCla cu a puntra e mandatario si e ta para tras di su palabranan di diamars ultimo den Parlamento unda cu el a bisa cu e mes ta duda cu e trabounan di Watty Vos Boulevard ta bay keda cla pa augustus proximo segun e contract cu e compania Mota Engil. E mandatario na e occasion a sorprende tur hende, bisando cu e mes no ta kere cu e trabounan lo keda clan a tempo.

RIPITI 

Awe mainta el a ripiti e palabranan, pero a bisa cu e ta spera cu e ta robez. E cantidad di trabou cu falta ainda, den e tempo cu tin ainda a pone e mandatario vocifera su opion e siman aki. 

TRABOU CU FALTA

E mandatario a bisa cu e trabounan tin cu caba pa augustus, pero ainda falta por lo menos 5 rotonde pa cuminsa ariba, ta trahando riba 3 rotonde awor, falta pa traha henter un overpass (na Hato) ainda, y un monton di cos mas. Pues tin basta trabou cu falta. Y e problema ta cu no por bisa Mota Engil nada. Segun e mandatario, nan por cera tur caminda (necesario pa e construccion) y no por haci nada contra esey. Y manera ta mira, tin hopi mas caminda cu lo cera den e lunanan nos dilanti. 

MULTA

Berdad cu gobierno a impone multanan caba na comienso, pero no por haci mucho cos al respecto ainda, sino te ora cu e trabou ta cla. Y asina mes, e compania por bringa esaki manera cu e haciendo cu e prome multa cu nan a ricibi di 2 miyon dollar. E representante di e compania a confirma na NoticiaCla algun tempo atras cu nan ta bringando e multa aki pero no kier a bisa mucho mas riba e tema. 

PRESION

A pone presion riba e compania pa medio di DOW, unda cu a pone nan reuni tur  siman cu e compania Mota Engil pa asina sigura nan cu trabou ta canando manera mester ta y cu pa augustus (stipula pa contracto), tur trabou keda cla. NOTA: E potret di NoticiaCla ta di trabounan cu tabata tuma lugar na luna di augustus di 2018 riba Watty Vos Blvd. E trabounan tin cu keda cla e aña aki na augustus di 2019.