Maduro: No a dicidi ainda si ta introduci sugar tax na Aruba

ORANJESTAD – Gobierno no ta logra introduci e asina yama ‘sugar tax’ pa 1 di juli 2019. Asina minister di Finanza Xiomara Maduro a confirma pa NoticiaCla. De hecho, no ta sigur mes cu e sugar tax lo keda introduci como un di e impuestonan ‘vicioso’. Esaki pasobra simplemente no a tuma un decision final riba e asunto segun Maduro. Cu e introduccion aki, e impuesto lo mester a genera 16 miyon florin extra pa caha di gobierno. Algo cu awor no ta parse di ta algo sigur. 

SUGAR TAX

E sugar tax ta un impuesto cu ta cay bou di e conotacion di ‘sin tax’, cu ta e termino pa impuesto pa productonan visioso. E pakico ta importante pa e impuesto aki keda introduci e aña aki ainda, ta  pasobra el a keda presenta como un di e ‘medidanan’ di gobierno pa genera placa extra, (16.7 miyon florin) cu awor ta na duda. Consecuentemente,  e mandatario a confirma pa NoticiaCla cu si no logra introduci sugar tax, tin cu busca e suma di 16 miyon di un otro caminda. Unda, no ta conoci, y no ta conoci si ta logra haci esaki pa 2019 ainda. Si no logra, e ta crea un otro buraco cu ya caba e colegio di supervision financiero a remarca, mester keda soluciona. 

CRITICA

E mandatario tabatin critica pa e companianan cu lo ta vociferando cierto informacion di e reunionan consultativo cu gobierno a tene cu nan. E mandatario ta referi na publicacionan (no riba noticiacla) specifico di companianan specifico afecta pa e introduccion di e implementacion di e impuesto aki. Loke si e portal aki a haci, ta ilustra un scenario di loke por sosode unabez cu e impuesto aki keda introduci y con e lo por afecta cierto instancianan na Aruba cu ta responsabel pa productonan cu ta contene sucu.