Efecto di ‘sugar tax’ por aumenta prijs di refresco drasticamente

ORANJESTAD – E introduccion di e asina yama ‘sugar tax’, of ‘sin tax’, cu ta simplemente impuesto riba refresco y of otro producto cu ta contene sucu, tin hopi hende preocupa. Sugar tax, of manera cu e ta wordo yama na Inglatera, e ‘soft drinks industry levy’, tin como meta principal pa demotiva e consumidor di cumpra e productonan aki, of limita esaki drasticamente pa asina purba yuda ‘cuida nos salud’, particularmente e asunto di ta un isla obeso. Gobierno sinembargo, for di loke NoticiaCla a compronde, no ta cla pa introduci esaki segun plan esta 1 di juli proximo contrario na loke nan a propaganda segun presupuesto 2019.

INTRODUCCION

E intencion segun gobierno ta(bata) pa entrante 1 di juli 2019, introduci e ley aki, (entre mas), cu fuera cu e tin e meta pa demotiva compra di e productonan ensera, mester (a) genera un suma di placa extra di 16.7 miyon florin den caha di gobierno.  Asina e colegio di supervision financiero CAFT a recorda gobierno den su reaccion di e ‘uitvoerings rapportage’ # 1 pa 2019. Si esaki no keda realisa pa e fecha menciona, e lo por bira un ‘otro’ buraco financiero cu gobierno mester logra cera prome cu fin di 2019 pa cumpli cu e presupuesto. Informacion cu NoticiaCla tin, ta mustra cu e caminda cu e concepto di ley tin cu cana, ta basta ‘curu’ ainda, den sentido cu e ta leu di  yega Parlamento pa un voto. Na e altura aki, ta keda Parlamento apenas 2 siman pa por logra algo ya cu despues nan ta ocupa cu Parlatino, IPKO y despues receso. No ta conoci si e ta esaki ta e tipo di ley cu por enforsa cu forza retroactivo. 

IMPACTO

E impacto di e impuesto aki segun analistanan economico cu NoticiaCla a recuri na dje, lo ta enorme, y porta mas ainda cu e otro ‘sin taxes’ introduci na comienso di aña di alcohol y cigaria. Esaki pasobra e impacto lo ta riba un grupo mucho mas grandi di persona cu ta e caso cu e prome ‘sin taxes’ introduci na comienso di e aña aki. Entre e productonan cu lo sinti su efecto, tin e popular refresco commercial Coca Cola y Pepsi Cola. Mientras cu Pepsi ta importa completamente, 10% so di tur Coca Cola bendi na Aruba, ta importa. E resto ta wordo produci localmente, cu por nifica un impacto riba e fabrica di traha e refresco aki. E pregunta aki cu ta wordo haci, ta si cu introduccion di e impuesto aki, e ta pone p.e. e existencia di e fabrica local aki na peliger. Si tene cuenta cu antes tabatin por lo menos 2 fabrica di refresco, y cu awor tin solamente uno, por pinta un scenario cu esaki lo por nifica cu e unico fabrica aki por sea reduce su personal, of mas drastico ainda, cera su porta. Pero esey tin cu keda pa mira, pasobra e compania ta bin di un famia di fabrica y negoshi hopi creativo, cu lo mester por sa con pa maniobra rond di e ‘reto nobo’ aki. Ademas tin ta considera e aplicacion di ley como discriminatorio, ya cu ta aplica esaki soalmente riba refresco y no otro productonan manera juice.   

EFECTO PA CONSUMIDO

E impacto entre otro mas grandi mester ta dirigi riba e consumido, pa cual e ley ta destina p’e : frustra e compra ‘masal’ di e tipo di refresco of producto aki cu ta contene sucu’. Pa loke ta e efecto directo commercial, mester hink’e den un contexto pa por compronde miho. Si awe un boter di p.e. coca cola di 2 liter ta costa 5 florin, esaki lo por aumenta cu 7 florin (3.5 pa liter) te na 12 florin pa boter. Pa un bleki, esaki por subi cu 1.25 extra. Ta usa e palabra ‘por’, pasobra e decision final no a cay ainda y tur esaki por cambia. Pero NoticiaCla a compronde cu esnan cu e cambio di prijs menciona, ta abase di intencion presenta pa gobierno na esnan cu ta bende y produci esaki. A compronde tambe cu hopi ta considera esaki como desproporcional, si tene na cuenta cu mundialmente, sugar tax, ta aumenta e producto mundialmente cu 20 cent pa producto. 

INTERNACIONAL

Un bista internacional di e portal aki riba e tema, ta mustra cu solamente Medio Oriente y Noruega a sea implementa of aumenta impuesto di sucu na e pais, cu entre 50% pa 100%. Esaki pasobra eynan e situacion di obesidad ta alarmante segun e gobiernonan respectivo. Y como tal esey ta e unico forma pa combati esey. Australia, mientras ta pushando pa un tipo di ley asina, cos ta poco mas diferente unda cu e companianan responsabel pa refresco, mes a anuncia y haci e cambio, reduciendo e cantidad di sucu den e productonan entre 10 pa 20%. Otro paisnan na mundo,manera Mexico, Chule, Francia y Hungria tur a introduci y of implementa impuesto di sucu, na 10 pa 18%. Merca mes, no tin un ley asina pa henter e pais, pero si algun estado tin cierto impuesto riba sucu.