ATIA atrobe sorprendi cu aumento di salario minimo

ORANJESTAD – E gremio commercial Aruba Trade and Industry Association (ATIA) a reacciona sorprendi riba e anuncio y implementacion di e salario minimo e siman aki. Asina nan ta bisa den nan comunicado di diabierna 3 di mei. Mester bisa cu no ta prome biaha cu ATIA ta sali bisa esaki, ya cu na dos occasion, esta na 2015 y 2017 ora cu e gobierno na turno a haci mescos, tambe ATIA a reacciona mescos, y ambos biaha esaki a keda publica den NoticiaCla tambe. Segun e comunicado di e gremio e biaha aki, riba 30 di april comercio a ricibi un sorpresa atravez di e medionan di comunicacion caminda a wordo anuncia door di Minister di Asuntonan Social y Labor cu un aumento di 3% di e salario minimo lo drenta na vigor dia 1 di mei 2019, pues e dia sigiente. ATIA ta lamenta cu e cambio aki no a wordo comunica di ningun manera previamente, siendo cu tawatin e oportunidad di hasi mencion di esaki durante e Dialogo Tripartite cu a tuma lugar 29 di april 2019 y caminda tur gremio y Minister di Asuntonan Social y Labor tawata presente.

LANDSBESLUIT

E Landsbesluit firma dia 30 di april pa hasi e cambio aki, ta menciona cu tin circumstancianan special cu ta sostene e decision pa introduci e aumento aki riba un fecha cu no ta 1 di januari, cual fecha ta loke ta stipula den articulo 13 inciso 1 di e Landsverordening minimumlonen. E circumstancianan special ta e introduccion di e asina yama “crisisheffing”. Raad van Advies den nan conseho ta duna di conoce cu nan no ta di acuerdo cu e ponencia aki ya cu segun Raad van Advies e efecto di e crisisheffing ta refleha den e calculacion di e indice di prijs pa cual motibo no por papia di circumstancianan special y e aumento di salario minimo por tuma lugar segun e ley ta stipula apartir di  1 di januari di e aña sigiente. Ademas, Raad van Advies ta cuestiona e porcentahe di 3%, mirando cu e crisisheffing a conduci na un aumento total di 2.5% den BBO, BAZV y BAVP, mientras cu esunan cu entradanan mas abou a wordo compensa por medio di un aumento den e reparatietoeslag. ATIA ta lamenta cu gobierno no a tuma e consehonan di Raad van Advies den consideracion.

Por ultimo, ATIA a señala cu e sumanan menciona den e Lbham, no ta cuadra cu e stipulacion den ley, caminda articulo 13 inciso 2 ta bisa cu e suma mester wordo aumenta den proporcion pa cu e aumento di e indice di prijs y mester wordo redondea na e multiple mas sercano di 5 cen. E sumanan nobo menciona, Afl. 1762.48, Afl. 411.07 y Afl. 9.17, no ta cumpli cu e stipulacion aki, pues lo mester hasi e ahustacion necesario den e sumanan den un lbham nobo. 

Cualkier aumento introduci di un manera abrupto tin su consequencianan pa comercio. Dunadornan di trabouw mester wak di unda nan ta saca e fondonan no presupuesta pa por cumpli cu cambionan cu ta wordo imponi di un dia pa otro riba nan. ATIA ta sumamente desapunta den e forma di proceder aki.