Gremio comercial ta lamenta cu no a consulta nan riba sueldo minimo

ORANJESTAD – Gremionan comercial ta lamenta cu Minister di Labor Paul Croes y Gabinete Mike Eman 2, no a consulta cu nan prome cu a dicidi pa aumenta e sueldo minimo. Despues di a tuma nota, di e declaracion di e mandatario Paul Croes awe den medionan di prensa, tabata notabel cu e mandatario a ‘consulta’ solamente cu gremionan sindical y no cu comercio mes. Esaki siendo cu ta bisa, cu elo no ta un problema pa comercio. Tanto ATIA (Aruba Trade and Industry Association) como Camara di Comercio a ‘lamenta e accion aki profundamente.’

ATIA

Den caso di ATIA, su presidente Michel Henriquez a bisa NoticiaCla.com awe mainta, cu “Menciona ta algo, consulta ta otro!!” refiriendo cu e mandatario a haci ‘mencion’ di e cambio aki, pero ningun momento a consulta, te pidi conseho riba esaki. ATIA tabata basta cla, siman pasa, riba e asunto aki caba, pero awor cu e mandatario ta confirma cu a consulta solamente cu e gremio sindical, y ta confirma cu enberdad “officialmente nan (gobierno) no a papia cu ATIA."

KvK

Pa loke ta Camara di Comercio (KvK), nan tambe a mustra nan desapunto riba e asunto aki, y e manera ‘unilateral’ cu gobierno ta actuando riba un tema asina. “Ta lamenta, cu gobierno ta tuma decision, sin consulta cu comercio, encuanto aumento di salario minimo y sin adheri na conseho di SER, mirando cu ta comercio ta esun cu mester carga e consecuencianan financiero.” Daphne Aguis Cesario-Lejuez a bisa NoticiaCla.com awe mainta.