- AZV: Contracto cu dentista Mayra Rosales ta termina
- Pastoral Hubenil Aruba cu Caminda di Luz Hubenil na misa di Dakota
- Gobierno Hulandes a anuncia pasonan conkreto despues di disculpa pasado di sclabitud
- Fin di siman aki gobierno nobo di St Maarten ta huramenta porfin
- Exposicion ‘The trip of my life’ na Bibioteca Nacional di Aruba
Oduber: Carta di specialistanan ta hopi duro cu acusacion fuerte
ORANJESTAD – Mientras cu e mandatario encarga cu salud, Dangui Oduber no a ricibi e carta oficialmente di specialistanan cu ta critica e directiva di hospital, e ta confirma pa NoticiaCla diahuebs, cu el a tuma nota di e contenido di e carta. Ta trata di e carta cu NoticiaCla a publica mas prome den dia unda cu e specialistanan ta bati alarma pa un situacion malo na hospital. “ E ta un carta hopi duro cu acusacionan fuerte den dje den direcion di bestuur di HOH” Oduber a sigui bisa e portal aki.
PREOCUPA
“Como minister responsabel pa maneho di salud publico, mi tambe ta sumamente preocupa cu e situacion cu a surgi” e mandatario ta sigui bisa.E ta sigura cu e problemanan aki no ta data di awor sino ta problemanan cu tin añas tumando lugar.
EX MINISTER TAMBE A FIRMA
Loke ta hala atencion segun e mandatario ta cu hasta e ex minister di salud, e specialista di pulmon Alex Schwengle, tambe a firma e carta di specialistanan. “ Y asina aki ta (e ta) confirma cu e no a atende cu tur e problemanan y preocupacionan cu tin na hospital y ta reconce e hecho cu e laga un desaster atras pa nos gobierno” Oduber ta sigui bisa.
HERENCIA
E mandatario ta mustra riba e herencia cu nan a haya ora cu nan drenta gobierno. “ Na momento cu nos a drenta gobierno nos a hereda un proyecto desastroso. Un proyecto di renobacion y ampliacion di hospital caminda sala di operacion a wordo lubida, intensive care a wordo lubida, medium care a wordo lubida, microbiology a wordo lubida y tur esakinan ta cosnan cu na mi parecer ta dificil cu por a wordo lubida zomaar. Un situacion di chaos total caminda nos pueblo ta bai paga 1 biyon florin pa un hospital nobo cu no bal e placa”. E ta mustra cu awor tin cu bay paga tambe 110 miyon florin extra caba di loke a wordo presupuesta.
TUMA ACCION
Obviamente e situacion aki ta uno fastioso y complica segun Oduber. “ Y nos lo sa, na un manera responsabel di tuma accionan necesario pa garantiza cu ta bin cambio drastico y tambe percura pa tin trankilidad den e operations di hospital” e mandatario a bisa. E no a bisa si ki accion, pero a bisa tambe cu e no por kita e RvT ni RvB, lamentablemente.
A prolonga ciere di frontera cu Venezuela cu cuater luna mas
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
Croes: Ta bay organisa un jobfair pa 45+ y penshonadonan
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
Croes: Aruba mester di 9000 trahado e aña aki pa hotelnan nobo!
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
Figaroa: Proximo gobierno mester consisti di solamente vakministers
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.
Minister na Merca ta lobby cu banconan pa fia 160 miyon dollar
WASHINGTON – Minister di finanza di Aruba Xiomara Maduro a cuminsa lobby cu varios banco Mericano e siman aki, pa logra haya un fiansa di 160 miyon dollar. E mandatario a confirma cu e ta na Merca pa ‘atende e IMF Spring Meetings na Washington DC’, unda cu e ta ‘probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba’. Algun di e banconan cu e mandatario a lobby cu ne pa purba haya fianza, ta JP Morgan, Standard Charter, Citi Group y Santander. Durante e lobbymento, e tin cu convence e institutonan financiero di tur loke ta pasa na Aruba y pa prueba cu Aruba tin un ‘stabilidad financiero cu ta brinda e confiansa na inversionista’. Segun e mandatario, e ta un suma cu ta wordo ‘refinancia’ di e debenan internacional existente cu ta madura. ‘ Como ta refinancia, esaki no lo crece e debe di Pais Aruba’, e mandatario a sigura bisando.
Wever: Fin di di dos cuartaal 2024, centro di Oranjestad ta haya mas luz
ORANJESTAD - Despues di e instalacion inicial di 50 luz aña pasa, ta intensifica e esfuerso pa mehora e visibilidad y seguridad den nos centro di ciudad cu instalacion di 100 palo di luz adicional nobo den nos centro di ciudad. E proyecto aki ta parti di e strategia holistico di revitalisacion di Oranjestad pa crea un ambiente mas sigur y atractivo pa tur su habitantenan, bishitantenan y empresarionan.
Follow NoticiaCla
