ORANJESTAD – E Asociacion di Specialista di Hospital di Aruba (ASHA) a duna hunta di directiva di hospital Horacio Oduber un siman tempo pa contesta un carta di 5 pagina cu nan(ASHA) a manda cu 6 punto di preocupacion cu nan ta considera serio, y 4 pagina yena cu firma di tur e specialistanan, cu ta den poder di NoticiaCla. Segun e carta, si ASHA no haya atencion di e señalamento di e problemanan actual y serio e.o. den e periodo menciona di un siman, nan lo ta ‘obliga di tene RvB (directiva di hospital) como responsabel y raporta esaki na IVA (Inspectie Volks Gezondheid Aruba. E carta fecha 15 di april 2019 ta firma pa tur e specialistanan envolvi, y ta dirigi na e presidente di hunta di directiva Ezzard Cilie cu actualmente ta e unico miembro di directiva, cu copia pa hunta di supervision. Cillie, ta reacciona den un forma hopi breve tambe pa NoticiaCla, cu el a ricibi e carta pero no ta bay comenta ariba. (Wak su comentario mas abou).
EXPANSION HOSPITAL Y RECONSTRUCCION HOH
Entre e 6 problemanan listra, e expansion y renobacion di hospital ta halto riba e lista. ‘Poco te nada di transparencia ora di tuma decision’ ta wordo menciona como un di e problemanan. ‘Maneho di compra di material sin input di expertonan riba e tereno, y esnan riba e tereno cu hopi biaha ta faya’ ta wordo indica den e carta tambe. ‘Nos kier mustra riba e situacion actual crea di e calidad di cuido cu no ta wordo yuda asina. Y un deficiencia a wordo crea di situacion peligroso, cu por a wordo evita si tabatin un relacion di cooperacion mas efectivo’ e carta ta sigui bisa.
RETIRO DIRECTOR FINANCIERO
Un otro punto di preocupacion ta e retiro di e director financiero algun tempo pasa, sin un anuncio previo of pa ASHA, y falta di un motibo pa cual e retiro aki a tuma lugar. E ta un accion cu ta cay pafo di e responsabilidad directo di e directiva, den e caso aki manera ya informa, consistiendo di solamente un persona esta Cillie. Esey ta nifica cu e (Cillie) ta e ultimo completamente responsabel di un organisacion hopi compleho. Ademas ASHA no a mira un aviso pa yena e vacatura. Si antes tin hopi caso cu no a wordo atendi na tempo, esaki lo sigui y aumenta segun ASHA. Ta trata entre otro decisionan riba tereno financiero, cu ta algo cu ta influencia e cuido diario den un forma negativo of te hasta ta hacie imposibel.
RECURSO HUMANO
Tambe ASHA ta critica e forma con e procedura pa tuma specialista na trabou ta hinca den otro. Segun ASHA ta basta tempo nan tin e preocuacion aki. Nan ta conciente cu e no ta un tarea facil, riba un isla chikito manera Aruba, pero nan ta experencia biaha tras di biaha, cu vacaturanan ta wordo exponi sea mucho laat, of no ta wordo poni, cu tur riba e tereno aki hopi biaha, segun ASHA, no ta wordo aprecia, y tin te hasta resistencia. Ademas un departamento di recurso humano no-adecuado, ta resulta cu bon specialista desea, finalmente ta dicidi pa no bin Aruba y cu coleganan specialista ta termina nan contracto di un forma prematuro. Loke ta remarkable cu ASHA ta indica, ta cu tin te hasta specialistanan trahando den HOH cu no ta dispone di un permiso di trabou. Un peticion no punctual of un extension tin tambe como consecuencia cu nan no ta sigura pa AZV.
CHAOS DEN DEPARTAMENTO DI COMPRA
E chaos den e departamento di compra di ‘mercancia’ y maneho di e inventario tambe ta un problema pa ASHA. Tin deficit continuo di mercancia, y ta trata di material altamente neceasrio y esencial, pa por haci operacion. No ta conoci pakico esaki ta segun ASHA, ni despues cu nan a puntra pa un splicacion.
CAIDA DI CALIDAD DI LABORATORIO
Como punto number 5, e asocacion ta haci mencion di e caida den calidad di e laboratorio. Nan ta mira cu e laboratory ta constantemente bou di presion. Entre otro e asina yama ‘testkits’ ta hopi biaha for di stock, y otro asunto ta tarda pa wordo procesa, manera test di sanger. Trahadonan no ta sinti nan mes sigur den e ambiente di trabou. Nan ta pidi tambe un auditorio independiente di e laboratorio pa asina indica unda e problemanan ta.
Esey ta varios di e problemanan menciona. NoticiaCla a compronde cu e problemanan relata ta serio, y no ta descarta cu si esnan responsabel no actua liher, cu esaki por tin consecuencia serio, si no ta desastroso. A compronde cu pa e motibonan menciona, hendenan ta muri, of haya complicacion envez di curamento y asina tin un sin fin di problema. A compronde tambe den ‘wandelgangen’ cu ta pidiendo retiro di e hunta di directiva (un persona ) y eventualmente e hunta di supervision.
REACCION DI DIRECTIVA
Den un reaccion breve di e unico miembro di directiva di hospital, Ezzard Cillie a confirma pa NoticiaCla cu el a ricibi e carta berdad pero no ta bay comenta. “Mi no tin reaccion pasobra mi no a logra studia e documento ainda y ta keda e pregunta kiko ta e balor agrega pa contesta vía prensa. E autor(nan) aparentemente a scohe pa e bai mediante prensa, y ta nan por contesta esey” Cillie a bisa brevemento pa e portal aki awe mainta. Lesa e carta AKI.
ORANJESTAD - E siman aki oficina di turismo di Aruba a anuncia e 5 ganadornan di e prome session di e progama Aruba Signature Experience pa 2024. Na aña 2021, Aruba Tourism Authority (A.T.A.) y Qredits Aruba a introduci e programa “Aruba Signature Experiences” cu e meta pa encurasha entrepreneurnan pa enfoca riba experiencia unico y inolvidabel pa nos bishitantenan.
ORANJESTAD - Dia 30 di maart ta Dia Internacional Cero Desperdicio (Zero Waste Day). E dia aki ta dedica pa eleva conscientisacion riba consumo y produccion responsabel y tambe na reduccion di desperdicio. Directie Natuur en Medio Ambiente (DNM) ta invita comunidad pa join nos den celebracion di e dia importante aki. Esaki ta e di dos biaha cu Nacionnan Uni (UN) ta observa e dia aki como cu ta na 2022 a tuma e decision pa e dia aki ta un dia observa internacionalmente. E
ORANJESTAD - Desde 2019 131 a incorpora un Conseho Hubenil den nan organisacion. E Conseho Hubenil di 131 su tarea ta pa primeramente duna conseho solicita y no solicita na e organisacion. Tambe nan ta duna conseho ariba proyectonan di 131, prome cu nan ser implementa. E Conseho Hubenil di 131 ta duna e organisacion un bista cu precision di kiko ta pasando bao di mucha y hoben y pakiko.
ORANJESTAD - Den cuadro di transparencia y informacion nos di Horacio Oduber Hospital ta comparti cu boso e cifranan pa loke ta luna di februari 2024. Como Hospital ta importante y alabes interesante pa duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto baby a nace durante luna, cuanto pashent a regresa cas despues di admision y mas.