Aruba ta bayendo bon pero no ta cla pa haya ‘zachte lening’

ORANJESTAD – Mientras cu Hulanda ta satisfecho cu con Gabinete Wever Croes ta manehando su asuntonan financiero actualmente, toch Aruba no ta cla pa haya e ‘zachte lening’ cu ayudo di Hulanda. Asina secretario di estado Hulandes Raymond Knops a bisa NoticiaCla dialuna durante un conferencia di prensa. Knops, acompaña pa minister Kajsa Ollongren (Asuntonan di Reino) tabatin palabranan positivo pa e medidanan cu Aruba ta tumando, y cu precaucion ta bisa cu e ta ‘satisfecho’. Pero falta algun aña ainda prome cu Aruba por ta asina leu cu su situacion y bin na remarke pa e palabracion haci pa ‘zachte lening’.

ZACHTE LENING

Tabata den un comunicado e fin di siman aki cu prome minister di Aruba Evelyn Wever a mustra cu e bishita di e minister ta su prome, y como tal durante e combersacion riba e tema aki di finanzas, ‘por bin claridad’ riba e tema aki. Esaki pasobra ta incomprendibel segun e mandatario con bin ainda Hulanda ta haci dificil pa yuda cu e ‘zachte lening’ aki. E zachte lening ta un ayudo cu Hulanda ta haci door di inscribi Aruba riba mercado internacional, y a cambio Aruba ta haya tasanan di interes sumamente abou mes. Algo cu a palabra, contal cu Aruba su finanza ta na ordo. Pa straño cu por zona sinembargo, durante e bishita, gobierno di Aruba a opta toch pa no trata e tema ey di ‘zachte lening’, contrario na e intencion den e comunicado. Y durante e conferencia di prensa, e mandatarionan Hulandes a confirma cu e tema no a bin na discussion. 

SATISFECHO

Di otro banda, riba pregunta di NoticiaCla, a puntra Knops e ora cu ya cu ta tocando e tema, con ta describi e impression cu nan a haya despues di a reuni cu Wever y Ruiz (di finanzas) awe mainta. Knops tabatin poco dificultad pa usa e palabra ‘satisfecho’, “Pasobra esey lo indica cu tur cos ta bon y cu nos ta cla” Knops a bisa. Mientras cu e tabatin palabra di elogio grandi pa e gabinete aki su empeño, el a mustra cu Aruba no tey si ainda. “E gabinete ta tumando pasonan dificil pero necesario. Mi tambe lo a tuma e pasonan asina si ami tabata den un situacion asina” Knops a bisa. E sa cu no ta decisionan facil, pero sigur necesario pa drecha un situacion financiero den e estado cu e ta(bata). E delegacion chikito ta sigui nan biahe awe nochi mes pa Bonaire pa sigui cu nan reunionan diamars.