Aruba kier sa di Hulanda pakico ainda no a haya ‘zachte lening’

ORANJESTAD – Gobierno di Aruba e siman aki ta spera di haya clarificacion di Hulanda pakico Aruba ainda no por haya un asina yama ‘zachte lening’ cu ayudo di Hulanda. Diadomingo y dialuna, e Minister encarga cu Asuntonan Interior di Reino, señora Kajsa Ollongren, hunto cu Secretario di Reino señor Raymond Knops, ta na Aruba pa bishita di trabou y e prome mandatario di Aruba riba e tema aki cu Minister Ollongren, lo por haya clarificacion. Fuera di e parti financiero, lo trata e tema di Venezuela. 

TEMPO Y AYUDO

Un di e puntonan cu  Prome Minister Wever lo splica Minister Ollongren ta cu Gobierno di Aruba nunca a pidi Hulanda placa. E unico peticion na Hulanda ta pa duna tempo y espacio pa traha. Na mes momento tambe Gobierno a haya ayudo tecnico riba tema di inmigracion y integridad. Pa tur esaki, Gabinete Wever-Croes ta gradici Hulanda pero placa si no a haya di Hulanda.  Segun Wever, comunidad den caso di placa, no ta comprende e pakico Hulanda ta asina contra pa yuda Aruba haya un ‘zachte lenining’. Den caso cu Aruba haya un ‘zachte lenining’, lo haci cu Aruba ta bay paga menos interes. E aña aki, Aruba mester paga 230 miyon florin na interes debi na e debe cu e Gobierno anterior a redobla cu tanto Hulanda como CAFT a permiti pa e Gobierno anterior redobla. Aruba ta pidi alivio di interes. No ta for di Hulanda lo haya e prestamo aki. Hulanda lo compaña Aruba pa bay mercado internacional busca e prestamo pa asina enbes cu Aruba paga 230 miyon florin na interes, por paga hopi menos na interes. Esaki Hulanda ta haci cu Sint Maarten y Corsou. Y pa Aruba Hulanda no kier haci esaki loke ta incomprendibel.   

BISHITA

Esaki ta e prome bishita na Aruba di Minister Ollongren y ta un bishita di menos di 24 ora, pa despues e sigui cu su bishitanan na otro islanan di Reino. Su bishita na e islanan primordialmente ta pa cera conoci cu e Gobiernonan.