Gobierno a firma MoU cu compania di helicopter pa Aruba

ORANJESTAD – Gobierno di Aruba (lesa Minister Andin Bikker:red) a firma un MoU diabierna cu e e empresa Colombiano SADI pa provee servicio di helicopter pa Aruba. E helicopter mes no a logra yega Aruba ayera debi na e restriccion aereo entre Venezuela y Aruba , pero e mandatario a priminti cu prome cu 18 di maart e helicopter lo ta na Aruba. A compronde cu e helicopter cu lo bin, ta uno temporal, mientras cu esun fiho ta wordo pinta aworaki ainda. Unabez cu e ta na Aruba e helicopter lo staciona na un post nobo na kazerne di Bombero na Tanki Flip. Esey ta haci tambe cu e salida di e vehiculonan di bombero awor lo ta diferente, pa no stroba e helicopter. E aparato actualmente ta na Riohacha Colombia, despues di a sali di Bogota.

SPECIFICACION

E helicopter ta un Bell 2016 L3 cu tin un motor Rolls-Royce 250-C30P di 650 Takeoff. Su capacidad ta di 6 pasahero mas 1 piloto y tin diferente aparato sofistica pa patruya Aruba su fronteranan. Tambe e helicopter por yuda den caso di emergencia pa transporta persona herida, special ora un persona accidente den cierto area cu ta dificil pa yega cu vehiculo. E empresa ta duna servicio tecnico pa loke ta mantencion y reparacion mirando cu nan tin flota grandi pa duna servicio optimal. Tur loke a menciona di e helicopter ta den cuadro financiero aproba pa Parlamento di Aruba.