Ruiz: No tin nada cu ta stroba CAFT di haci su trabou

ORANJESTAD – No tin nada (falta di info) cu ta stroba CAFT di haci su trabou. Asina Minister di Finanza Xiomara Ruiz a bisa NoticiCla diaranson mainta, reaccionando riba e carta di CAFT cu un ultimatum. Mes momento Ruiz a sigura cu gobierno no ta sorprendi cu e lista di pregunta cu e colegio di supervision financiero CAFT a manda pa nan recientemente. De hecho, gobierno a contesta CAFT dia 24 di januari ultimo, cumpliendo cu e ‘deadline’ di 14 dia.  

DEADLINE

“Semper tin un deadline den cual Gobierno mester reaciona riba e conseho di CAFT. Esey no kiermeen cu den 14 dia e presupuesto mester keda cambia a base di nan recomendacion. Nos a contesta caba y a bay riba e ponencianan treci dilanti” Ruiz a sigui bisa. Awor e ‘contestacion’ ta termina, a lo menos cu CAFT bolbe informa cu algo ‘nobo’. Algo cu segun Ruiz, CAFT a haci den pasado caba.

CONTESTA

Manera cu NoticiaCla a presenta diamars, CAFT a manda un lista di 4 recomendacion cu e kier pa gobierno cumpli cu ne dentro di 14 dia, tur relevante pa e presupuesto 2019. Ruiz den su contesta pa e portal aki  a splica cu mayoria, si no ta tur, pregunta haci na gobierno, tin un contesta ariba den sentido cu e contestanan tabata cla disponibel caba. Mas bien gobierno a recorda e colegio unda y con e informacion a keda suministra. Y pa clarificacion, gobierno a mustra CAFT den nan contesta (di gobierno:red) kico ta kico atrobe.

E liña grandi di pregunta di CAFT tabata sinta den e hecho cu gobierno no a duna ‘suficiente’ informacion, y no a splica suficiente con cierto puntonan a keda estableci. Pero segun Ruiz, CAFT ta bon na altura cu den e uitvoerings raportagenan (tin 4), tin cuenta annual, y tin reunionan di contacto, unda cu por haya tur e informacion cu nan (CAFT:red) a pidi. “Nan por yega na tur e informacion via varios caminda” Ruiz a bisa, indicando cu no tin nodi pa mas splicacion. 

CRISIS PLAN 

Asina mes, Ruiz a opta pa duna un splicacion atrobe na CAFT, pa e puntonan di preocupacion. Entre nan tin e hecho cu CAFT ta cuestiona cu nan kier tin e presupuesto di e fondo di crisis plan, siendo cu nan no tin e autoridad pa controla esey. Segun Ruiz, e protocol y ley di LAfT ta autorisa CAFT pa controla solamente e presupuesto di pais Aruba y no esun di e crisis plan pasobra esaki ta aparte. Berdad cu e fondonan algun ta wordo alimenta for di e presupuesto, pero esaki no ta nifica cu CAFT por controla esey. No obstante esey, Ruiz a mustra cu tin suficiente mecanismo den e ley di e fondo di crisis plan, cu ta duna transparencia pa CAFT por wak. Tin p.e. un articulo 5 den e ley, cu ta splica cu lo tin raportages continuo cu ta duna CAFT inzage den e cifranan cada cuartal. “Pues CAFT no mester ta preocupa” e mandatario a sigura NoticiaCla. 

DIVIDENDO

Pa loke ta e preocupacion di reparticion di divivendo, Ruiz a splica cu gobierno ta trahando riba e maneho di esey. Mes momento ta conoci cu pais Aruba por spera un entrada minimal di 5% di e companianan estatal, dependiendo di nan rendimento . Y ta keda na Raad van Comissaris pa dicidi cuanto gobierno ta haya. “Mi ta compronde e preocupacion di CAFT ya cu den otro islanan tin problema den overheids nvnan, pero esey no ta e caso na Aruba” Ruiz a bisa. Ademas mester tene na cuenta cu e companianan mester keda na bida, y no por duna e dividendonan no obstante e solvencia di e respectivo compania. 

SECTOR COLECTIVOUn di e criticanan grandi di CAFT tabata riba e parti colectivo, unda cu a mustra cu tin falta den esaki. Aki e mandatario a bisa cu a manda un plan pa secretario di estado di Reino Knops, y ta wardando un contesta y un aprobacion di esaki. Pues nan ta trahando riba dje y e informacion ey ta disponibel (via Knops mes). “Gobierno di Aruba awor ta wardando riba e reaccion (di Hulanda:red)”. 

INFORMACION

En general, segun Ruiz, CAFT no ta aki awor sino basta tempo y ta conoci caba pa nan cu informacion no ta bin tur ora mes liher y nan mester por compronde esaki. “Nos a bisa CAFT caba (den pasado) cu informacion cu gobierno haya, CAFT ta haya. No tur ora e informacion ta bay mes liher, pero nan (CAFT:red) ta haya informacion” Ruiz a sigui bisa. Segun e mandatario, e colegio ta gusta puntra cos, siendo cu nan sa caba con cos ta funciona. Pa loke ta e asunto di personal, gobierno a sigura cu nan a ‘cumpli’. 

REFORMA FISCAL

Un di e otro critica di CAFT tabata e falta di informacion riba e operacion di e reforma fiscal. Aki tambe Ruiz a mustra cu e reforma ta operacional, reparti den 4 fase. Y aki tambe CAFT tin informacion di con esaki ta funcionando. A mustra cu CAFT cierto forma ta contradeci su mes ya cu nan mes ta bisa cos cu nan a controla of ta wak caba. “No tin nada cu ta stroba CAFT di haci su trabou” Ruiz a bisa finalmente.