ORANJESTAD – Gobierno di Aruba a haya dos siman tempo pa cumpli cu (un serie di) recomendacionan haci pa e colegio di supervision financiero den nan ultimo rapport cu a bay publico e siman aki pa por cumpli asina cu e presupuesto 2019. Ta dialuna e rapport di CAFT riba presupuesto 2019 a bira publica, mientras cu gobierno a ricibi esaki 14 di januari ultimo. Den e recomendacion aki CAFT ta bisa cu e resupuesto 2019 ta ‘insuficientemente verificable’. “E splicacion riba e presupuesto no ta ofrece suficiente informacion”, e rapport ta sigui bisa. Como tal a duna conseho di minister 14 dia, pa contesta con ta bay atende cu e 4 recomendacionan cu nan a pone den nan rapport. E 14 dianan a cuminsa cana na momento cu e carta a sali pa gobierno, esta 14 di januari ultimo.
INSUFICIENTE
Segun CAFT, nan ta mustra cu gobierno no a cumpli suficientemente cu e recomendacionan haci cu CAFT a haci na October 2018 riba e concepto di e presupuesto e tempo ey. “Como tal ta dificil pa CAFT hustifica si Aruba ta riba e ‘caminda duradero di finanzas publico cu e presupuesto 2019’. A base di esey, CAFT ta duna 4 recomendacion cu gobierno tin cu duna oido na dje (ainda).
RECOMENDACIONAN
Entre e recomendacionan, gobierno mester duna un bista riba e plan di reforma fiscal, unda cu e splicacion, e planificacion y e posibel resultadonan di e reforma general ta wordo splica. Ademas, CAFT kier pa stipula un presupuesto detaya pa e fondo di prespuesto interino SCP, unda cu ta mustra claramente na cua proyecto ta gastando fondo y pa ki tempo tin pensa di haci e gastonan aki. Tambe for di e presupuesto aki mester sali na cla cu eventual expansion di personal pa e Crisis Plan Social lo por trece e meta pa laga e gastonan di personal baha entrante 2019 na peliger, y cu esaki mester compensa esaki otro caminda. Ta despues cu establece e sector colectivo 2019 y 2020, CAFT de hecho por midi si henter e sector colectivo di 2019 ta cumpli cu e normanan legal. CAFT cu esaki ta urgi pa riba termino, determina e sector colectivo. Finalmente, CAFT kier pa gobierno duna mas informacion riba e asina yama ‘estimacion multianual’. Si no ta cla kico e consecuencianan financiero ta pa loke ta e efectonan di maneho riba e postnan di presupuesto, esaki mester wordo menciona. “En todo caso, mester estima cu cautela” CAFT a sigui bisa.
DEADLINE
E colegio ta sigui bisa cu conforme articulo 11, inciso 4, LAFT ta pidi CAFT pa gobierno dentro di 14 dia, mas tarda 28 di januari (2019), informa e colegio hasta ki punto y den ki forma, e lo tene cuenta cu e recomendacionan haci pa e colegio. Por lesa e reaccion completo AKI.
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.