Paseo Herencia riba peticion di polis a cancela evento cultural Venezolano

ORANJESTAD – Riba peticion di polis, Paseo Herencia a dicidi di para e evento cultural cu tabatin programa pa diaranson otro siman 23 di januari 2019. Asina gerente general di Paseo Herencia, Valerie Pieters Camacho a confirma pa NoticiaCla diahuebs atardi. E peticion a bin segun Pieters, basa riba comocion cu a bin y pa evita cualkier problema y malcomprondemento, Paseo Herencia a coopera cu polis y a dicidi di cancela e evento. Pieters a bisa cu no kier pa tin problema y como tal a dicidi pa tuma e curso aki. Anteriormente e portal a haya confirmacion cu e evento cultural lo a continua, pero den oranan despues, a bin e cambio cu e evento no ta sigui mas.

PROBLEMA

Manera NoticiaCla a raporta anteriormente, e evento su poster lo a crea un problema y preocupacion cu lo tabatin un manifestacion politico na e centro commercial turistico. Pero mirando e confusion, e doñonan di e centro commercial a acerca e organisadornan y bisa nan pa cambia e poster pa evita problema. Mientrastanto e topico a bira uno cu a crea confusion den comunidad, y a base di esey, polis a cay aden y a acerca Paseo Herencia cu e peticion pa para e evento pa evita problema. NoticiaCla a compronde cu tin un otro evento e mesun fecha, tumando lugar riba Plaza Bolivar, cu posiblemente ta uno politico.