Paseo Herencia: Evento Venezolano no ta protesta sino uno cultural

ORANJESTAD – No tin ningun protesta Venezolano tumando lugar na Paseo Herencia otro siman, sino un show netamente cultural. Asina e gerente  general di e centro commercial na Palm Beach, Valerie Pietersz-Camacho a sigura NoticiaCla diahuebs mainta. Un poster di e evento a crea comocion den comunidad for di diaranson, cu e pregunta, con ta laga un protesta Venezolano tuma lugar den un centro commercial den un area turistico. Pero Pietersz-Camacho a bisa cu, manera ta custumber di Paseo, nan ta host varios pais cu nan show cultural, y esaki tambe ta un di nan. A compronde e comocion, pero ta un lema riba e poster ta loke a causa esaki y a pidi e organisacion cu ta organisa e evento, Venaruba Solidario pa adapta e poster, y kita e parti cu ta bisa ‘Gritemos con brio, Muera la oprecion’. 

EVENTO

Segun Pietersz-Camacho, Paseo Herencia pa henter nan existencia a bin ta organisa y ta anfitrion di eventonan cultural di Aruba y otro paisnan. “Nos ta e centro cultural di Aruba” Pietersz-Camacho a bisa. Den cuadro di esaki, varios pais manera di Peru, Filipinas y tambe Venezuela a tene shownan cultural na e centro aki. Den e caso aki, esun aki tambe ta un show cu artista cu lo keda celebra dia 23 di januari como un muestra di e movimento di cambio den e pais Venezolano. A sigura cu Paseo Herencia no ta permiti ningun tipo di evento di protesta, pasobra esaki ta un centro turistico. 

CONMOCIONPietersz-Camacho a confirma cu e ta na altura di e comocion cu e poster aki a crea na Aruba, y e bruhamento cu esaki a causa. Pietersz-Camacho a splica tambe cu den curso di dia awe, tanto e organisadornan di e evento como Paseo Herencia lo sali bin afo y clarifica e situacion pa no tin mas confusion. 

OTRO PROTESTA

NoticiaCla a compronde mientrastanto cu lo tin un otro evento, den forma di un protesta tumando lugar riba Plaza Bolivar. Posiblemente esey ta loke cu tin hende confundi.