Ansary: Problema entre Banco Central y Ennia tabata pa un ‘misunderstanding’

ORANJESTAD/WILLEMSTAD – E problema entre Banco Central di Corsou y St Maarten y Ennia cu a cuminsa aña pasa ora cu Banco Central a pone Ennia bou di curatela, por a wordo evita cu un yamada of un bishita entre e presidente di Banco Central y doño di Ennia, e biyonario Iranes Hushang Ansary (91). Asina e biyonario a bisa durante un entrevista exclusivo na Telecuracao diadomingo anochi. E entrevista conduci pa e periodista Nicole Maduro, graba siman pasa na Miami, tabata e prome declaracion public cu Ansary a duna desde cu Banco Central a tuma control di Ennia na Corsou na juli aña pasa. ‘E tabata un misunderstanding’ Ansary a sigura Maduro na varios occasion durante e entrevista, y a bisa cu tur esaki por a wordo evita si a tuma contacto cu otro. A mustra cu no tabatin nada malo cu e 200 miyon cu a saca for di Ennia y inverti na Merca. Y tambe cu ningun cliente di Ennia cu tin placa inverti na Ennia, mester ta preocupa. Aña pasa ora cu e noticia a plama, Ennia Aruba mesora a informa su clientenan localmente cu esaki tabata un problema netamente na Corsou y St Maarten solamente.  

DETAYES

Maduro su meta tabata pa haya sa detayes di e loke a pasa aña pasa dia 4 di juli 2018, ora cu Banco Central dado momento a cay aden y a tuma maneho di Ennia Corsou over y pone bou di curatela. Mes momento durante varios intento, Maduro kier a tende di Ansary cu clientenan no mester tabata preocupa cu nan inversion. Ademas a puntra Ansary pakico ta awor numa e ta bin dilanti y papia publicamente. Segun e biyonario, el a hacie pa respet pa e director di Banco Central, sr Jardim ta un bon persona, economista, pero cu e no sa con pa maneha un compania priva, entre nan, un compania di seguro. Ta prome biaha tambe cu Banco Central tin un politico na mando, y esey no ta algo positivo pa e instituto financiero. Segun Ansary, politiconan no por maneha negoshi y esaki ta loke ta sosodiendo. E ta spera cu pronto henter e debacle ta tras di lomba y cu no obstante henter e problema aki, su sosten pa cu Corsou no ta cambia.

EMERGENCY

Ansary a laga sa tambe cu si e tabata na altura di e ley di emergencia, nunca e lo a inverti 10 cen den Corsou. Esaki ta e ley cu ta pone cu Banco Central por a interveni aña pasa den e maneho di Ennia. “Mi no tabata na altura di dje. Si mi tabata na altura, mi lo no a inverti 10 cen na Corsou”. Ansary a duna ex prome minister Don Martina e credito pa su presencia na Corsou mas di 32 aña pasa (na 1986). Pero tabata te na 2000 cu a dicidi di tuma un decision pa inverti na Corsou, y 6 aña despues, cu ta tuma cierto companianan (manera Banco di Caribe y Ennia ) over na 2006. Nunca, segun Ansary, tabatin problema y si a djis tuma contacto cune, tur cos lo a bay diferente. Pa awor e kier tur cos resolvi y bay bek na normalidad.