AAA: Keho riba TripAdvisor di aeropuerto no ta cuadra cu berdad

ORANJESTAD – E comentario negativo di un pasahero riba e portal internacional conoci ‘TripAdvisor’, contanto su mal experiencia na aeropuerto di Aruba, no ta cuadra cu berdad. Por lo menos, no segun vocero di aeropuerto Hendrik Croes. Un pasahero Mericano (PatrickG2) a keha cu debi na e tardansa desorganisa na aeropuerto, e y su famia a perde su buelo. El a describe su ‘odisea’ y a bisa cu 20 otro persona tambe a perde nan buelo. E storia sinembargo, segun official di aeropuerto ta otro. Ta mas bien e pasahero a yega laat y a ‘paga e prijs’.

PASAHERO

E pasahero ta cuminsa alerta tur hende di e tardansa na aeropuerto. E ta mustra cu a dura 4 ora y mei for di ora cu el a pasa den e porta principal, te ora cu el a yega na e porta di salida (gate). “Y claro cu nos a perde nos buelo” e persona ta sigui bisa. “Nunca mi tabata na un aeropuerto asina yen, manera esun di Aruba” e ta sigui conta, refiriendo na su experiencia di diasabra, cu tabata ‘super Saturday’ , manera cu e portal aki a raporta diadomingo, unda cu mas di 10 mil pasahero a keda tramita.  “20 persona cu mi sa a perde nos buelo di AA (American Airlines) pa DFW so. Mi tabata bisa tur hende cu nos no tabata bay logra, debi na e liñanan largo, pero ningun hende no a worry of por a yuda. Nos a wordo bisa pa algun persona cu nan lo a wanta e buelo, y cu tin miles di hende cu retraso”. E homber ta sigui conta cu na e porta di salida (gate) tabatin un persona di e aeroliña cu tabata purba yuda, a bisa cu e situacion ta asina pa un luna caba. “Bay aeropuerto 5 pa 6 ora delanta si bo kier alcansa bo buelo”, e homber ta sigui bisa. E ta gusta e isla, pero e no ta bin bek den temporada halto, te ora cu e aeropeurto ta ‘drecha’, indicando cu parti di e problema ta e trabounan di reconstruccion cu ta bezig. 

KICO A PASA

Sinembargo, ora cu NoticiaCla a tuma contacto cu aeropuerto, su vocero Hendrik Croes a mustra cu cos tabata diferente. “ E pasahero cu a duna e review a yega airport 1 ora y mei prome cu su buelo” Croes a cuminsa bisa. “ Mirando cu tabata super Saturday, tabatin long lines. Ora cu e airline a bai busca e pasahero den e rij, e no a ni yega CBP (Douane Mericano)  ainda, dus e ora e buelo a bai sin nan. Pesei ta pidi pa tur pasahero tei 3 ora prome cu nan buelo” Croes a sigui bisa. Pues un version diferente cu e pasahero a bisa y pone riba internet. 

COMENTARIO

E reaccion riba rednan social tabata basta. Algun a tuma parti pa e turista, citando nan propio experiencia mientras cu otro a tuma parti pa e turista cu a keha. Varios di nan ta comenta cu e problema ta cuminsa no na e parti local, sino e parti Mericano, mientras cu otro nan ta bisa cu all around tin problema cu trahado, esta understaffing, cu no tin suficiente personal causando cu e liñanan ta largo. Ademas tin construccion tambe tumando lugar y cu esey por ta un motibo pa cual por tin problema tambe.