Minister a prohibi AZV pa apela caso contra baby Lunah

ORANJESTAD – Gobierno a prohibi AZV pa apela e caso di baby Lunah. Asina minister di Salud, encarga cu AZV Dangui Oduber a bisa durante tratamento di presupuesto 2019 den Parlamento diabierna, contestando pregunta di parlamentario Hendrik Tevreden di MEP. E declaracion ta contradeci loke cu AZV a bisa NoticiaCla na November ainda, esta cu e  tabata preparando pa apela e caso LAR medio 2019. “E caso di baby Lunah ta un caso hopi tristo” Oduber a bisa. Pero e no kier mas sufrimento pa e famia y no kier pa e famia wordo cobra (door di AZV). A sigura Parlamento cu e director nobo tambe a keda notifica di e decision aki.      

PARA CASO

Tabata diabierna pues durante contestacion di preguntanan di parlamentarionan cu Oduber a sigura e parlamentario Tevreden cu el a informa tanto e director anterior Anko Ringeling como esun actual nobo Ruben Goedhoop cu e no ta comparti e pensamento di AZV pa apela e caso cu e famia di baby Lunah a gana na januari  di e aña aki. El a bisa cu a manda un e-mail y un carta pa tur dos bisando nan cu e no kier pa nan sigui cu e caso. A mustra cu baby Lunah ta ‘proving the system wrong’ den sentido cu hopi experto a bisa cu e baby lo no a pasa 6 luna di bida, pero cu el a caba cumpli tres aña di existencia. 

DIRECTOR AZV

Tabata fin di October ultimo cu durante e prome entrevista cu Goedhoop a duna NoticiaCla como director di AZV,  el a splica cu mientras cu ta compronde dolor di e famia di baby Lunah, nan ta ehecuta un ley y no por bira of cambia e ley. AZV ta un organo ehecutivo di e Ley AZV, pues aki ta nifica cu e ley AZV ta defini kico por y no por. E director ta mustra cu na AZV nan no ta den e posicion cu por haci of duna tur cos. E mesun ley ta defini cu cierto tratamentonan ta ‘uitgesloten’. Di otro banda, semper AZV mester keda mente habri pa wak con por yuda, tambe den casonan excepcional cu awor ta cay bou di e margen di Ley AZV. Ta di menciona si cu den caso di baby Lunah, AZV ta cumpliendo cu e veredicto di huez. Pero mes momento a confirma cu e apelacion ta sigui. 

FAMIA RABIA 

Mientrastanto e famia tabata prepara pa entrega documentacion legal prome cu e fecha di 7 di December ultimo pa cu e caso di apelacion. Mientras cu no tabatin fecha pa e caso di apelacion tuma lugar, tanto e mama como AZV a confirma cu e caso tabata pendiente pa tuma lugar medio 2019. Ta trata di un caso LAR bodemzaak den apelacion. Segun AZV a bisa NoticiaCla fin di November ultimo enberdad e LAR bodemzaak ta cana den hoger beroep. “E hoorzitting di hoger beroep zaak ta pendiente pa tuma luga medio 2019” tabata palabra di AZV. Lesa e entrevista cu e director nobo di AZV riba e tema AKI