Goedhoop: Comunidad mester haya sa mas miho kico AZV ta y no ta

ORANJESTAD – Comunidad mester haya sa mas miho kico AZV ta y no ta. Asina director nobo di AZV Ruben Goedhoop a bisa NoticiaCla recientemente den un entrevista. Un topico cu a wordo elabora riba dje durante e prome entrevista cu Noticia Cla, unda cu e director nobo a wordo puntra specificamente tocante e caso di Baby Lunah. Un caso cu a causa basta discordia den comunidad y tabata kier a sa di e director, con esaki a afecta e organo aki. Segun  director Ruben Goedhoop, e hendenen lo mester haya sa mas miho kico AZV ta y kico e no ta. 

DIFICIL PA TUR PARTIDO         

Segun Goedhoop, hende mester compronde cu aunke cu e seguro di AZV tin basta cuido regla toch tin un cierto limitacion tambe. AZV ta mara na un ley (esta Ley AZV) cu ta defini kico si y kico no. E caso di Baby Lunah ta un di e cosnan cu Goedhoop a hereda. Goedhoop no ta gusta e situacion aki tampoco cu e famia ta pasando aden y lo kier yuda unda cu por yuda. Sin embargo, e realidad ta cu AZV ta mara na e ley AZV. 

EHECUCION DI LEY

Goedhoop ta splica cu mientras cu ta compronde dolor di e famia, nan ta ehecuta un ley y no por bira of cambia e ley. AZV ta un organo ehecutivo di e Ley AZV, pues aki ta nifica cu e ley AZV ta defini kico por y no por. E director ta mustra cu na AZV nan no ta den e posicion cu por haci of duna tur cos. E mesun ley ta defini cu cierto tratamentonan ta ‘uitgesloten’. Di otro banda, semper AZV mester keda mente habri pa wak con por yuda, tambe den casonan excepcional cu awor ta cay bou di e margen di Ley AZV. Ta di menciona si cu den caso di baby Lunah, AZV ta cumpliendo cu e veredicto di huez.  

IMAGEN DI AZV

E director ta admiti cu casonan asina manera di Baby Lunah, ta afecta e imagen di e compania. “Si, pasobra tur hende kier yudansa. Y special si ta bo mesun yiu, bo mesun famia, you do whatever it takes” Goedhoop ta bisa. Como tal e no ta tuma e famia na malo. Pero e famia(nan) tampoco no por tuma AZV na malo segun e director, cu nan man ta mara na regla y ley. “Nos no ta stipula ley. Nos trabou ta pa ehecuta e ley”. Eynan loke por haci ta busca e miho forma di comunica cu e famia y pa bisa kico un pashent tin derecho ariba y kico no. Esey ta un di e puntonan pa mehora di AZV, esta haci mas intento pa laga e aseguradonan compronde kico si y kico no ta cay bou di cobertura di AZV. Mes momento Goedhoop a admiti cu ta papiando cu minister pa wak con por cambia of resolve esaki pa ‘suavisa e situacion’. Sin embargo, no kier anticipa riba e combersacionnan aki. Ta den e trayecto di orientacion y dado momento AZV hunto cu tur otro stakeholders lo mester haci escogencia. A mustra si cu si compara e pakete di producto cu AZV ta ofrece, e ta miho cu cualkier otro pakete den region, Aruba ta bendiciona y tin un pakete hopi mas amplio cu cualkier otro pais.