ESPN Latin a cubri 4 atleta local cu a capta atencion internacional
ORANJESTAD – E conocido cadena di television ESPN ta mundialmente conoci pa transmiti programanan relata cu deporte riba canal di television y rednan social. Pa e region Latino America esaki ta yama ESPN Latin y ta transmiti na e idioma spaño. Riba iniciativa y bao guia di Aruba Tourism Authority e seccion di ESPN - Women Latina America, a bishita nos isla pa cubri bida di cuater atleta local cu a sa di capta atencion internacional cu nan logronan grandi den deporte. Nan ta conta nan storia di perseverancia y determinacion. Ademas, ESPN ta mustra e bida diaria di cada un di nan, con e ta pa biba cu e deporte, nan training y kico e ta pa ta un hende muhe den deporte en general y e sacrificio pa nan biba como atletanan mundial den e prestacionnan top di nan deporte.
Aki nos ta papia di Kayla Arends y Mali Rafini conoci pa nan participacion y logronan importante den Beach Volleyball. E aña aki e team Arends-Rafini a participa den e weganan, e asina yama ‘Youth Olympic Games’ na Buenos Aires – Argentina.
Tambe nan a sigui bida di Sarah-Quita Offringa, un windsurfer professional conoci pa ta den e top globalmente cu a logra 14 biaha pa ta e campeon mundial den Freestyle y Slalom.
Y e atleta Monica Pimentel cu su logronan den e mundo di Taekwondo, unda el a bay representa Aruba na e weganan Olympico na Rio de Janeiro, Brazil na 2016.
Pa algun dia, ESPN a sigui bida di e cuater atletanan di serca, pa duna un bista con nan deporte ta combina cu nan bida diaria.
Ademas, e ekipo di ESPN a haya e oportunidad di cera conoci y graba varios otro atraccionnan cu nos destinacion ta brinda na e bishitantenan.
ESPN Woman ta enfoca riba hende muhe remarkabel den e mundo deportivo cu un angulo riba innovacion y inspiracion, cual ta wordo transmiti den mas cu 12 pais Latino Americano cu un audiencia average di 20 miyon televidente. Cada programa ta wordo ripiti 2 biaha pa dia durante full un siman. Tambe esaki lo wordo transmiti den e mercado di ESPN Norte America.
Aruba Tourism Authority ta haci su esfuerso continuamente pa mehora nos industria turistico y ta haci esaki posibel por medio di strategia y methodonan innovativo y mas actual. Ta busca diferente angulo pa asina nos destinacion ta keda ‘top of mind’ di e bishitante. E transmision na ESPN ta duna un oportunidad unico pa promove nos atletanan Arubiano professional y naturalmente esaki ta un posibilidad bunita pa Aruba sigui haya cobertura amplio como destinacion turistico.
A.T.A. kier a gradici tur esnan cu a contribui na e produccion aki y specialmente e atletanan pa pone nan tempo disponibel pa esaki.
Inter ta titula campeon di Italia pa di 20 biaha ganando di AC Milan
MILAN – E ekipo di futbol professional Italiano Inter a gana su di 20 titulo di campeon di Italia, despues di a gana e final contra AC Milan dialuna atardi cu score di 2-1. Denzel Dumfries, e orguyo di Aruba a drenta den 7 minuut prome cu final di e partido , pero a keda expulsa algun minuut despues cu carchi cora na final pa un bringamento cu un hungador di AC Milan Hernandez cu a provok’e. Un asunto cu tabata canando caba. Cu e victoria aki, inter por pone un di dos strea riba nan uniform den e proximo temporada. AC Milan tin uno.
Ekipo di Denzel Dumfries (Inter) ta hunga contra Milan pa e titulo di Italia awe
MILAN – E ekiponan rival Italiano AC Milan y Internazionale ta topa otro pa e titulo nacional. Interesante pa Aruba ta cu e ‘Arubiano’ Denzel Dumfries ta figura den e hungadornan pa e seleccion di Inter. E ekiponan ta rivalnan grandi di otro. Mientras cu Inter ta e faborito, 46% chens pa gana epartido, un victoria no ta sin mas. Milan lo haci tur cos pa daña e ‘fiesta’ di Inter. E hecho cu Inter a gana Milan 5-1 tempran den e temporada aki, no ta nifica nada pa e wega di awe nochi, segun comentarista italiano di futbol. E wega ta cuminsa pa 2:45pm ora di Aruba.
MLB impresiona cu catcher di Aruba pa Atlanta Braves Chadwick Tromp
ATLANTA — E pelotero professional di Aruba Chadwick Tromp ta hayando mencion tras di mencion pa su prestacion actualmente den e ekipo di Atlanta Bravez. E siman aki tabatin un otro raportahe riba su prestacion, unda cu varios punto di Tromp ta resalta. Entre nan, su abilidad pa conecta cu pitchernan di su ekipo, e determinacion pa traha duro, e disciplina y su forma di ta. Y e prestacion actual pa e temporada aki unda cu e la habri 6 wega caba como e catcher principal pa e ekipo, ta wordo considera como remarkable.
E careda di ciclista ‘12 Hours di Aruba’ ta bolbe na 2024!
ORANJESTAD - E tenshon ta subiendo mientras e edicion di 2024 di 12 Hours di Aruba ta acercando. Riba djasabra 20 di april, participantenan entusiasta di entre otro Aruba, Curaçao, Bonaire i Hulanda ta reuni na Sero Cristal pa un di e eventonan mas emocionante den e region. Cu un mescla di adrenalina, team spirit i pa un bon causa, e evento internacional aki organisa pa FX Hubada ta promete pa ta un espectáculo cu ningun hende kier perde.
Coredornan di Aruba ta cla pa e marathon di Londen pa diadomingo
LONDEN – Un grupo basta grandi di por lo menos 10 coredor di Aruba ta participa diadomingo na e marathon di London, considera como un di e marathon crucial internacional. Diabierna nan a registra nan mes oficialmente y a haya nan number y bib (e registro electronico) pa nan por participa. For di e portal deportivo 297 Sports, noticiacla a compronde cu tin por lo menos 50 mil participante diadomingo awor. Esnan di Aruba cu ta participa ta e.o. e docter di cas Joaquin van Trigt y e coredor conoci Shariska Winterdaal, Ana Mujica, Jeanette Croes, Lili Mejia, Edeline Weller, Filomena Paesch, Esther Colina, Carla Fingal y Ricky Refunjol. Potret cortesia 297 Sports.
Rafael Nadal: Mi ta considera esaki como mi ultimo aña (hungando tennis professional)
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
Follow NoticiaCla
