Homber ta bisa cu e no a mata su casa riba crucero na Aruba

SPANISH FORT  - Leo Tenorio, casa di Almarosa Tenorio (52) cu a muri riba un bapor crucero yegando Aruba siman pasa, a bisa cu FBI a desacredita e acusacion cu su casa a wordo choca pa un homber prome cu el a cay di e bapor crucero diamars marduga 13 di november 2018.  E mes ta insisti tambe cu e no a mata of lastima su casa. Esaki segun un raportahe di e canal di television Fox10 News. Autoridad na Aruba (incluyendo ministerio publico di Aruba) no ta autorisa pa declara nada mas na prensa y ta referi tur pregunta na FBI. Tabata diamars marduga siman pasa pues cu Almarosa Tenorio a muri despues di un caida di e di 16 piso di e bapor crucero Royal Princess ora cu e bapor tabata yegando Aruba. Segun e canal di television, FBI no a comunica bek pa confirma declaracion di e casa.  

DECLARACION

Dialuna ultimo,(Leo) Tenorio a bisa FOX10 News cu su casa no a wordo asesina. E ta bek na Merca despues di a wordo interoga y laga den libertad pa autoridad di Aruba. Segun Tenorio, e no ta un sospechoso tampoco. Mientras cu el a haci e declaracion ey, e no tabata cla pa bay riba camara ainda. Su yiunan si a haci nan declaracion riba camera di noticia y NoticiaCla a raporta esaki tambe. 

TRANQUILIDAD

Leo Tenorio a bisa cu e kier privacidad y tempo pa recorda su casa. E ta spera tambe cu hende no husga mucho liher te ora cu FBI caba cu su investigacion. Segun e raportahe, e curpa di Almarosa ta na Aruba ainda y FBI ta sigui cu nan investigacion. E investigacion lo no caba te ora cu e curpa ta bek na Merca. Investigadornan ainda no a duna e causa di morto.