Autoridad di CAFT ta keda un problema y discussion pa politica local

ORANJESTAD – E autoridad cu e colegio di supervision financiero di Aruba (CAFT) tin, ta keda un problema y discussion den politica local. E siman aki esey no ta diferente.  Fraccion di MEP e siman aki un biaha mas a sigura cu nan no ta acepta pa Hulanda y CAFT impone normanan adicional, mientras cu fraccion di AVP ta mustra cu CAFT no a haci nada otro sino nan trabou. Tur esaki basa riba e ultimo interpretacion di e colegio di supervision financiero riba e presupuesto supletorio 2018, unda cu e colegio ta pidi pa mas accion pa e aña aki ainda. “No lo acepta normanan adicional cu Hulanda kier impone”, ta palabra di Rocco Tjon, lider di fraccion di MEP, mientras parlamentario di AVP Richard Arends ta mustra cu “CAFT no ta exigiendo nada riba su mes”. 

PRESUPUESTO SUPLETORIO 2018

E Presupuesto supletorio 2018 no a haya un bon punto cerca e colegio di supervision financiero manera cu NoticiaCla a raporta caba, y gobierno (y tambe manera NoticiaCla a raporta caba), a reacciona ariba caba. Den e reaccion ey, prome minister Evelyn Wever tabata mas cauteloso cu su palabranan, mientras cu colega minister di finanza Ruiz si no a mengua su disgusto contra e colegio di supervision.

MEP VS AVP

Fraccion di MEP tambe no a keda atras y su lider Rocco Tjon no a sconde su disgusto tampoco. Tjon su punto ta cu ‘presupuesto supletorio 2018 no ta conta cu surpasonan y a wordo ehecuta dentro di e margin aproba pa Parlamento’. Pues no por bin haci mas cos awor pasobra nada ‘robez’ no a tuma lugar cu merece mas atencion. Tjon ta referi ademas na e mocion cu Parlamento a aproba algun tempo atras, fihando ‘e rumbo pa yega na finanzas duradero’. Ademas segun Tjon, CAFT a acepta e FEM (FInancieel Economisch Memorandum). Y como tal, ‘ningun norma adicional por conta cu sosten di Fraccion di MEP. Esaki pa motibo cu gasto di personal y con fondonan adicional (meevallers) mester wordo aloca, ta keda un aspecto di maneho di pais Aruba y prerogativo di Gobierno di Aruba’. Y Tjon ta haya cu Hulanda mester respeta nos estado di derecho. “ Como representante di pueblo hamas lo bay di acuerdo cu pasonan irresponsabel cu ta perhudica nos ciudadanonan y pais Aruba, manera CAFT y Hulanda ta desea”. Miembro di fraccion di AVP Richard  Arends den un reaccion breve pa NoticiaCla ta mustra cu contrario na e ponencia di minister Ruiz (cu a bisa cu CAFT kier sinta riba stoel di minister), e ley di supervision financiero no ta permiti CAFT sinta riba stoel di Gobierno ni di Parlamento. Segun Arends, CAFT no ta exigiendo nada riba su mes. “CAFT ta simplemente urgi Gobierno pa mantene nan mes na promesanan cu Gobierno mes a hasi encuanto reduccion di personal y e cuadro financiero cu Gobierno mes a presenta den e FEM” Arends a sigui bisa.