CAFT: Aruba no a tene su mes na palabracion haci

ORANJESTAD – Segun e colegio di supervision financiero di Aruba (CAFT), gobierno (di Aruba) no a tene su mes na un serie di palabracion haci cu e colegio di supervision. Pa remedia esaki, e colegio ta recomenda pa gobierno (di Aruba) usa 11,8 miyon pa baha e debe di pais Aruba. Y pa cubri e contratiempo y e intensificacion di e gastonan, mester economiza di otro forma. Ademas mester economisa cu 14,2 miyon florin mas riba gastonan di personal pa e aña aki ainda, pa asina e gastonan total di personal suma 470,7 miyon florin. 

TONO DIFERENTE

Cu un tono diferente y fuerte, e colegio ta asina adresa gobierno den nan ultimo conseho diamars. E conseho mester a keda publica otro siman, pero debi cu minister Ruiz Maduro a cita di e rapport, CAFT mester a publica esaki mas tempran. Ruiz durante su comentario riba e conseho mes a indica cu CAFT a cambia su tono pa cu Aruba, y esaki ta bin cu e dos miembronan nobo di e colegio, tanto esun nobo di Aruba Hellen van der Wal como esun di Hulanda, Henk Kamp. Van der Wall a cuminsa na augustus y Kamp tambe. 

INCUMPLIMENTO

Gran parti di e tono di e conseho di e colegio, ta basa riba e incumplimento di promesa haci entre gobierno y CAFT, di algun luna pasa. Ademas, ta mustra cu door di aumento di e gasto di personal, y e no uso di e entrada inespera pa reducci e debe nacional, e presupuesto no ta contribui pa yega na e meta pa tin finansas sostenibel. Tambe CAFT ta reclama cu den e presupuesto no ta mira cu a tuma medida structural pa banda di e gastonan. “Enbez di un reduccion structural di gastonan di personal manera cu CAFT a palabra cu gobierno y cu ta necesario pa yega na finanzas sostenibel, e gastonan di personal a aumenta” CAFT ta sigui bisa. “Contrario na loke a wordo poni den e BVP, ta aumenta e gastonan di personal, envez di reduci esaki”. E entradanan inespera ta wordo usa tambe pa financia parti di e contratiemponan. Tambe CAFT a constata cu tin un entrada inespera basta cantioso cu ta wordo usa pa financia un Fondo Social interino di e plan social di crisis, crea pa ehecuta e crisis plan social.  

“CAFT ta conclui cu a base di lo previo, no ta cumpliendo cu e palabracionan cu CAFT a haci den juni di e aña aki cu (gobierno di) Aruba”. E gastonan di personal no a wordo reduci conforme palabracion haci y no a usa e entradanan inespera pa reduce e debe. Ta den cuadro di esaki cu CAFT a recomenda e accionan inicial raporta pa tuma lugar. Lesa e conseho completo AKI.