Oduber: Investigacion na DVG no a resulta na fabor di e director

ORANJESTAD - E resultado inicial di e investigacion (doorlichting) contra director di dept di Salud Jerry Staring no ta na fabor di e director. Asina minister di salud Dangui Oduber a bisa NoticiaCla dialuna durante e conferencia semanal di gobierno. Segun Oduber, tin cu tuma decision awor riba e resultado aki. Ta siman pasa cu gobierno (lesa minister:red) a haya presentacion di e 'doorlichting' haci. Y awor pues tin cu dicidi con ta bay haci cu e resultado. E mandatario no a bisa si, si e investigacion ta completa of no. 

INVESTIGACION

Manera ta conoci, for di luna di juni a inicia un investigacion contra e director pa cu su actuacion como director. "A pone hopi enfasis, riba e maneho di e director, comunicacion den e departamento, con satisfecho e tabata" Oduber a bisa. Aki e mandatario a bisa cu e resultado di e doorlichting no ta na fabor di director. "E doorlichting a comproba inquietud cu tabatin den e departamento" Oduber a sigui bisa. No a tuma un decision final ainda con e resultado di e investigacion lo bay afecta e director. E director mientrastanto a bay corte varios biaha contra e mandatario pa bringa e decisionan tuma den su contra. E prome caso el a gana, ora cu gobierno no por a strobe di drenta e lugar. Sinembargo e caso cu el a entama contra gobierno pa e por fungi como director, si no a bay bon. E mester a fungi y lo ta fungiendo como un beleidsmedewerker te ora cu e investigacion termina. 

SITUACION ACTUAL

Oduber a sigui bisa cu mientrastanto e director ta trahando como 'beleidsmedewerker', aunke cu aki tambe e no ta funcionando. Esaki pasobra segun Oduber, e director a haya un 'opdracht' pero cu ainda e no a cuminsa haci e trabou cu e mester a haci y a haya orden pa haci.