Oduber: Director DVG poni riba ‘non actief’ pa 6 siman

ORANJESTAD – Director di Directie Volks Gezondheid (DVG) Jerry Staring ta na cas, pendiente e ‘doorlichting’ cu ta cuminsa dialuna proximo. “Mi por confirma cu mi a sinta cu sr Staring y informe di e situacion cu lo bay haci e doorlichting y lo mester dura 6 siman” Oduber a bisa NoticiaCla. “Durante e proceso aki e director lo wordo poni op non actief” e mandatario a finalisa bisando. Mientrastanto lo nombra un management team cu lo tin cu dirigi e departamento e tempo ey.

E CASO

Manera cu e portal aki a raporta ayera den forma di primicia, e decision mester a cay ayera riba futuro di e director. E mandatario a confirma cu tin basta keho a drenta contra su prestacion, y cu diahuebs decision lo a cay si ta pone e director op ‘non-actief’ of si ta lague funciona durante e proceso di investigacion.

KEHO Segun e mandatario for di siman pasa a ricibi un carta di preocupacion di yen di trahado di DVG. E kehonan ta acusacionnan hopi serio riba funcionamento di e director. A compronde cu no ta prome biaha cu ta ricibi kehonan asina. “Mirando e seriedad di e caso, nos a sigui e proceso cu nos ta suppose di sigui como minister responsabel” Oduber a sigui bisa, indicando cu a tuma contacto cu Departamento di Recurso Humano, cu a guia nan den e proceso. “E conclusion ta cu algo mester sosode” e mandatario a sigui bisa. Un frase a resalta di e conseho cu e mandatario a referi na dje, na Hulandes, esta ‘Het likt onvermijdelijk dat de DVG een nieuwe start moet maken”. Traduci, esaki kier men cu ta mustra inevitable cu DVG mester haci un cambio nobo. Loke esaki ta nifica segun Oduber, ta cu sea mester busca un director nobo of mester bin un reorganizacion.