Corte: Minister mester pone van Dijk bek como directora BMC

ORANJESTAD – Gobierno (lesa: minister Rudy Lampe) mester permiti sra Rosanna van Dijk pa asumi su funcion di director di e Bureau Multidisciplinair Centrum (BMC) bek mesora sin problema. Asina Corte a dicta dialuna mainta den un sentencia contra gobierno. Ademas corte a destrui e carta di dia 27 di augustus ultimo cu a informa van Dijk cu e no por fungi mas como director di e centro. Manera cu NoticiaCla a raporta anteriormente, riba e fecha menciona, gobierno a hala van Dijk di su funcion. Van Dijk a bringa e decision aki y awe e resultado ta conoci. 

CASO

E caso a keda entama pa van Dijk na fin di augustus ultimo, y a keda trata dia 15 di October ultimo. Van Dijk tabata kier pa corte destrui e decision di minister cu ta prohibie di traha como director na e centro. A trata e proceso cu van Dijk a cana pa bira director di e centro, y con gobierno actual a strobe di funciona. A mustra e.o. cu for di mei di e aña aki, gobierno a wanta e decision pa nombra van Dijk como directora. A protesta contra e decision aki pero gobierno a insisti y a argumenta den un carta na augustus cu van Dijk tabata stroba e proceso y vision nobo pa e centro y como tal a ‘hale un banda’. Van Dijk a bringa e ponencianan aki tanto via carta como den corte. 

ARGUMENTACION

Den corte, huez a mustra cu basa riba e informacion presenta, ta resalta cu van Dijk no ta un directora interino sino un directora cu funcion completo y nombra como tal. Pesey no ta compronde cu ta sigui mira como interino. Ademas huez a mustra cu gobierno no a logra argumenta suficiente pakico kier a stroba van Dijk di eherce su funcion. Huez ta mustra tambe cu no por tilde van Dijk lo a strobe e implementacion di e vision nobo di gobierno actual. Interesante ta cu huez ta bay asina leu di indica te hasta cu ‘tin e chens cu e decision (pa stroba van Dijk pa traha como directora) lo no wanta den un eventual caso di profundidad (bodemprocedure). Cu esaki e ta indica cu poco palabra cu den un bodem procedure tambe van Dijk por gana e caso, basa riba argumentonan presenta.  

SENTENCIA

Como tal, huez a dicta awe mainta cu 1. Ta destrui e carta di gobierno di dia 27 di augustus 2018 cu ta prohibi van Dijk pa traha como directora di BMC. 2. Mester permiti e directora di haci su trabou y no por stroba e directora den eherce su funcion debidamente. Lesa e sentencia AKI.