Minister a retira directora di MDC pa otro por implementa maneho

ORANJESTAD - Cu e intencion di cambia e maneho na e Multi Disciplinaire Centrum (MDC), minister di Enseñansa Rudy Lampe a retira e directora a actual Rosanna van Dijk diamars mainta. Segun e mandatario, esaki ta debi cu e kier a implementa e maneho nobo pero cu van Dijk no tabata coopera. Segun e unico reaccion di van Dijk na NoticiaCla, e retiro tabata 'sin motibo valido'. Mas e no kier a bisa mirando cu tin un caso sumario pendiente riba e tema aki. Lampe mientrastanto a declara mas tempran na prensa cu e ultimo lunanan tabata dificil papia cu e directora, cu e ta yama uno 'interino'.  

INTERINO

E mandatario den su comentario na prensa mas prome,  tabata referi na van Dijk como 'interino' esta waarneemer di e centro, mientras cu for di fuentenan cu NoticiaCla a consulta, nan ta sigura cu van Dijk ta directora. Van Dijk ,- cu tin un doctorado den psicologia y un maestria den psicologia clinico-, tabata na MDC for di 2014 inicialmente como coordinador y despues di e 'ontkoppeling di Directie Onderwijs', el a bira hoofd van dienst.

TRAHADORNAN 

Pa loke ta e trabounan na e centro, NoticiaCla a compronde cu lo tabatin keho riba esaki tambe. Tambe tin e asunto di trahadonan cu ta disgusta y otronan cu no ta. Segun informacion ricibi, tin trahadonan cu a bay sea voluntario mientras cu otronan lo a wordo kita obligatoriamente. Pa loke ta e grupo di trahado cu a bay, e portal aki a compronde cu lo ta minister Lampe a saca nan pasobra nan ta amiga di e persona cu a wordo suspendi . Esey a pone cu tin dos grupo di trahado den e centro. Uno cu ta pro y otro cu ta contra. Particularmente e grupo di e amiga suspendi, y un grupo di trahado cu tabata haci nan trabou sin mete den asuntonan personal.  

DI ACUERDO CU MINISTER?

Minister Lampe den su declaracion na otro medionan diamars, a mustra cu el a hala e directora (interino) un banda pasobra e (e directora) lo no ta di acuerdo cu e maneho di e minister, y den e funcion cu e ta, e mester simplemente ehecuta e maneho di e minister. E portal aki a compronde cu fuentenan ta mustra cu minister nunca no a presenta un maneho nobo na MDC ni van Dijk

NO TA RETIRA NINGUN HENDE

Den un reaccion na un otro medio, minister Lampe diamars a sigura cu e no a kita ningun hende for di trabou y cu, mescos cu a sosode den un sentencia den un caso den corte (recientemente cu e director di DVG), el a haci van Dijk beleidsmedewerker. Pues no por papia cu el a kit'e. For di mesun fuentenan cu e portal aki a consulta, ta mustra cu esey no ta cuadra y cu Van Dijk lo no a acepta e posicion di beleidsmedewerker. No ta conoci ki dia e caso sumario aki lo tuma lugar.