Minister Romero conmovi cu asesinato di miembro di su staff Harmon Girigorie

ORANJESTAD – Un di e personanan cu a keda conmovi y afecta pa e asesinato di e ciudadano Harmon Girigorie diamars anochi ta minister di Transporte Chris Romero. Girigorie tabata parti di su staff den edificio di Cocoloshi y un bon amigo. “Awe mi a perde mas cu un amigo, mi a perde un ruman” Romero a cuminsa na bisa riba su pagina di Facebook. “ Den nos afliccion, mi ta manda mi mas sincero condolencia na tur esnan cu, mescos cu mi, ta sufriendo e perdida fisico di Harmon Girigorie. Cu Harmon sosega na pas” Romero a finalisa bisando. Girigorie tabatin como tarea asisti cu ayudo logistico y parti di seguridad di e ministerio. 

E CASO

Tabata diamars anochi nochi pa 8or central di polis a haya ta un yamada cu un rato prome un caso di tiramento a tuma lugar na altura di Julio’s Bar na San Nicolas. Patruya di San Nicolas ta yega na e sitio di e sucedido y a pidi ambulane cu urgencia. Ambulance a yega na e sitio y a trata e victima pero lamentablemente no por a haci nada pa e victima. Pa 8:50 dr.Britt- Croes ta constata morto di e victima masculino cu  Harmon Girigorie naci dia 21 december 1985 na Aruba. Recherche a jega na e sitio y tuma e investigacion over. Polis technico a yega na e sitio pa hasi nan investigacion tamve. Slachtofferhulp a wordo pidi pa asina papia cu e famia di e victima y asistinan. Fiscal a laga tuma e curpa den beslag. 

SOSPECHOSO 

MIentrastanto den oranan mas laat di anochi, Cuerpo Policial Aruba a informa cu den e caso di tiramento fatal mas trempan cu a tuma lugar, e sospechoso un rato paso a entrega su mes na warda di polis na San Nicolas.  E sospechoso di inicial M ta un homber naci na Corsou na 1974, segun vocero policial suplente Liliana Rasmijn.