Bikker: Pa eror, KPA a manda potret di accion di ilegalnan gara, pa prensa

ORANJESTAD – E potretnan cu polis a manda pa prensa algun siman di un accion riba ilegalnan, tabata un error. Asina minister di husticia Andin Bikker a bisa den un conferencia di prensa. Ora cu e caso a tuma lugar, orden di abogado a protesta tanto na prensa local como cuerpo policial di Aruba, citando violacion di derecho di ser humano. E orden a manda un carta pa e mandatario di husticia tambe. Segun Bikker, KPA a pidi despensa na orden di abogado pa cu esaki verbalmente. “Ora cu mi reuni cu nan, nos lo ripiti e loke a tuma nota di dje” Bikker a bisa. “No ta e intencion cu den futuro cuerpo policial ta bay comparti potret di accionan. Esey ta na prensa mes cu diligentemente ta dicidi si nan ta publica esaki si of no. 

POTRET

E caso tabata algun siman pasa ora cu polis a manda un serie di potret di ilegalnan y manda esaki pa prensa. Varios medio di comunicacion, (incluyendo NoticiaCla) a publica esaki, mirando cu el a bin di polis. Pero e orden di abogado a  mustra cu esaki no ta corecto y cu ta basta tempo nan ta evaluando pa haci algo y awor a opta pa actua contra esaki. 

REUNION CU MINISTER

E mandatario en cuestion a splica NoticiaCla cu e no a haya oportunidad pa reuni cu e orden di abogado, y ta spera cu proximamente e por tin e oportunidad pa haci esaki y aclarea un ke otro.

BALANSA

Mes momento Bikker a mustra cu prensa tin cu deal cu e balansa den democracia unda cu bo tin e libertad di prensa y di otro banda, cu publico tin e derecho di informaicon, pero tin tambe e ‘potretrecht’ pa proteha e persona. Tambe bo tin e ‘asumption’ di inocencia unda cu un persona no ta pasobra el a wordo deteni , cu automaticamente el a haci su mes culpable na algo. Den e balansa aki, e mandatario lo atende cu e orden di abogado proximamente pa mira unda e frontera ta riba privacidad di persona y e otro frontera ta yega pa loke ta libertad di prensa.