Orden di Abogado contra cu KPA a suministra potret di ilegalnan

ORANJESTAD - Orden di Abogado contra cu KPA a suministra potret di captura di ilegalnan. Asina nan ta informa pa medio di un comunicado di prensa diaranson. Segun e comunicado, directiva di Orden di abogado regularmente ta ricibi kehonan di colega abogado tocante publicacion di portret di sospechoso nan (hopi biaha menornan di edad), victima nan di trafico of persona nan cu pa nan mala suerte ta presente un caminda na mal momento. Publicacion di tipo di portret nan asina por forma un infraccion grandi ariba bida personal, porta perhudica un persona pa un of otro motibo of por complica resocialisacion di un persona. Na mes momento naturalmente ta asina cu sociedad tin derecho ariba informacion adecuado y hasta por ta asina cu tin un interes en conneccion cu un investigacion cu cierto portret nan wordo publica. Esaki nan ta escogencia nan cu cada periodista mester haci ora di eherce nan trabou. Lastimamente cu na Aruba ta asina cu no tin regla codigo di ethica periodistico, no tin un ograno disciplinario, y periodismo como gremio no ta demostra capacidad di autoregulacion. Orden di  Abogado ta considera esaki di ta un problema serio. 

POTRET

Ariba dia 23 di september 2018 diferente websites di noticia a publica un noticia cu durante un listramento preventivo 27 “illegal nan” a wordo deteni. E noticia aki a wordo publica hunto cu un cantidad di portret di persona di cua na e momento ey ainda no a wordo estableci cu nan ta illegal of cu nan lo ta culpable di algun otro delito. Esaki nan tabata portret saca hopi serca (close up) y den color, y saca ora e persona nan aki tabata den e van di KPA. Despues di a puntra 3 diferente periodista a bin sali na kla cu e portret aki a bin for di KPA mes, cu KPA ta ofrece esaki nan via un chat na e diferente fuente nan di noticia na Aruba. Orden di Abogado ta asombra cu miembro nan di KPA ta informa pueblo ariba un forma asina ki. Na prome luga no ta e trabou di KPA pa saca e portret nan y comparti e portret nan aki di persona nan cu ta wordo deteni, of cu ta wordo para, of cu ta wordo hiba pa polis. Ariba dje KPA ta alimenta e resentimiento of rabia cu tin bou di cierto hende nan aki na Aruba contra illegal nan (lesa: Venezolano nan). Di e forma aki KPA ta contribui na e endurecimiento di e clima contra e grupo di hende nan aki y nan deshuminizacion. Ta parse cu KPA ta lubida cu esnan cu ta wordo presumi di ta illegal tambe tin derecho ariba privacy. Esaki tambe ta conta pa e periodista nan cu no ta tene na cuenta cu nan funcion ta trece un responsabilidad cu ne.

VIOLACION DI SECRECIA

Orden di Abagodo ta mustra ariba cu e manera cu KPA ta comparti informacion na prensa of otro persona nan, posiblemente lo por wordo kwalifica como violacion di nan secresia profesional (“schending beroepsgeheim”). Violacion di secresia profesional ta un acto criminal a base di nos codigo penal (art. 2:232 Sr) cu por conduci den terminacion di labor. 

 DESAPROBACION 

Orden di Abogado ta desaproba enfaticamente e manera di traha aki di KPA y ta suplica KPA, Aduana, Directie Volksgezondheid y prensa pa demostra hopi cautela cu esaki ora di manda portret nan di persona nan cu ta wordo presumi di a comete un delito, di persona nan cu ta wordo deteni of para dor di polis of cu pa casualidad ta presente na e momento y luga equivoca.