Gobierno di Aruba y Corsou cu atencion pa su peloteronan profesional

WILLEMSTAD/ORANJESTAD – Tanto gobierno di Aruba como di Corsou a duna atencion na e hecho cu tin yiu di tera den e weganan di playoff di baseball grandes ligas cuminsando e siman aki. Un total di 5 hungador di Reino Hulandes, manera cu NoticiaCla a raporta caba ta figura den e weganan, reparti den varios ekipo. E diferencia ta cu gobierno di Aruba a limita e felicitacion na solamente e hungador di Aruba Xander Bogaerts, mientras cu gobierno di Corsou a opta pa felicita tur 5 hungador, incluyendo esun di Aruba. E wega mas interesante ta cuminsa diabierna ora cu e rivalnan di tur tempo, New York Yankees y Boston Red Sox topa otro pa wak cua di dos ta haya e derecho pa representa liga Americana. Loke ta hacie mas interesante ta cu den cada un ekipo tin un hungador di Corsou of Aruba. Pa Aruba Xander Bogaerts ta den Boston Red Sox, y pa Corsou,  Didi Gregorius ta den New York Yankees.