E-mail di Ursell Arends pa pidi camber extra, ta corta dos banda

ORANJESTAD – Un email cu lider di partido Raiz Ursell Arends a manda pa oficina di minister Otmar Oduber na mei di e aña aki, y cu e mandatario di infrastructura a produci dialuna como prueba, ta comproba cu enberdad Arends a haci un peticion pa un reunion cu e mandatario pa toca e tema di ampliacion di cantidad di camber pa un hotel. Oduber a acusa Arends den fin di siman di e practica aki, y Arends diadomingo a desmenti cu el a haci esaki. Di otro banda, e ta coregi tambe algo cu Oduber a bisa di Arends, cu no ta corecto. 

EMAIL A CORTA DOS BANDA

Cu e mail cu Oduber a produci dialuna, e kier a mustra cu Arends no a papia e berdad diadomingo durante su evento di colecta firma pa un moratorium. Pero den e mesun email, Arends ta haya rason cu e no a haci e peticion pa mas camber, na nomber di e hotel cu e ta traha como Operations manager, (La Quinta Beach Resort), sino na nomber di e asosacion cu e ta presidi, esta Aruba Time Share Association (ATSA), y un di e hotelnan miembro, Paradise Beach Villas. 

E PONENCIA

Manera cu NoticiaCla a reproduci diadomingo, e mandatario a haci un declaracion for di diasabra indicando cu Arends ta aplica double standard ora cu di un banda e kier un moratorium pa hotel, y di otro banda ta pidi pa expansion di mas camber di hotel. Den e declaracion, Oduber ta bisa cu “ E propio Sr Ursel Arendsz cu ta purba bruha opinion publico, ta e persona cu recientemente ta pidi gobierno actual, den su calidad di presidente di ATSA y General Manager di Paradise Beach Resort, un reunion pa amplea nan cantidad di kambernan di hotel cu 200 kamber”. 

GERENTE Y ASOSACION

E problema ta cu den e declaracion ariba, Oduber ta referi na Arends como gerente general di Paradise Beach Resort, siendo cu Arends ta operations manager di La Quinta Beach Resort y no gerente general di Paradise Beach Villas, y den e mesun email, ta firma e email como tal tambe. Ademas den e mail Arends ta bisa cu e ta haci e peticion den calidad di presidente di asosacion y no su propio interes. Arends ta bisa den e mail, cu ta su ‘deber como presidente di e asosacion pa establece un liña di maneho entre e industria y gobierno”. Oduber sinembargo ta bisa cu ta trata di e propio interes di Arends, y ta referi na e “ peticion pa ampliacion di cantidad di kamber di su hotel”, pero esey tampoco ta corecto.