RAIZ: No a reuni cu AVP y no a pidi expansion di 200 camber di hotel

PALM BEACH – Lider di partido politico Raiz Ursel Arends a desmenti acusacion di parti di ministerio di infrastructura, cu pa medio di un comunicado a sigura cu Arends lo a haci peticion pa amplia e cantidad di camber di Paradise Beach Resort cu 200 camber. “Esey no ta berdad” Arends a bisa, na occasion di e coleccion di firma pa para construccion di mas hotel. Ademas el a coregi e informacion bisando cu e no ta gerente general di Paradise Beach Villas pero di La Quinta Beach Resort. Pues cu nan tin cu busca informacion corecto. Finalmente, Arends a desmenti tambe cu e lo a reuni cu miembronan di partido AVP. Segun e lider politico hoben, ora cu partidonan ta reuni pa asunto di acuerdo di gobernacion, y aworaki partido Raiz no tin ningun motibo pa haci tal. Ademas, ta considera e tactica di e partido di unda e informacion a sali (partido POR:red) como un ‘deflection’ esta pa desvia di e asunto di moratorium di hotel. 

DOBBLE STANDARD DI PARTIDO RAIZ Y SU LIDER

Tabata den fin di siman cu NoticiaCla a ricibi un comunicado di partido POR cuestionando e intencion di Arends, indicando cu ta practicando ‘double standard’. “ Mientras cu di un banda ta vicifera e opinion di preocupacion pa e situacion di capacidad di carga y consequencia di e cantidad di kambernan otorga den pasado (No awo), partido Raiz y su Lider, Sr Ursel Arendsz, ta haci uzo di e sensitividad di e topico pa haci politica di nivel baho” e comunicado a bisa. Segun e comunicado, “ E propio Sr Ursel Arendsz cu ta purba bruha opinion publico, ta e persona cu recientemente ta pidi gobierno actual, den su calidad di presidente di ATSA y Generel Manager di Paradise Beach Resort, un reunion pa amplea nan cantidad di kambernan di hotel cu 200 kamber”. “Ta di lamenta con Sr Arendsz y partido Raiz, di un banda ta pretende di ta preocupa cu e capacidad di carga di nos Isla, pero ora ta toca su propio interes, ta haci peticion pa ampliacion di cantidad di kamber di su hotel. HET KAN VERKEREN !” e comunicado ta sigui bisa. Potret cortesia Facebook Raiz.