Bosman na Tjon: CAFT no ta contra statuut

DEN HAAG/ORANJESTAD  -" Interesante ta cu lider di fraccion di partido MEP, Rocco Tjon ta haci como si fuera cu Hulanda ta impone norma riba Aruba". Asina vocero di fraccion pa VVD den Tweede Kamer Andre Bosman a bisa NoticiaCla diahuebs for di Hulanda, riba e declaracion di Tjon riba e situacion di CAFT y e involvimento di Hulanda den esaki. "Sr Tjon sa porta miho cumi, cu ta Aruba mes a pone e normanan aki" Bosman a sigui bisa, refiriendo na e ley di LAFT. "Si Aruba no cumpli cu e normanan, College Financieel Toezicht lo duna gobierno di Aruba e orden pa drecha e situacion financiero den cuadro di e propio ley y regulacion. Hulanda no ta involucra den esaki den absoluto" e Parlamentario Hulandes a bisa. 

PERDE AUTONOMIA

E hecho cu Tjon ta para ariba cu Parlamento mester mantene su autonomia, y cu Hulanda kier dicidi of impone, Bosman ta bolbe reitera cu Hulanda no tin un tarea den e supervision financiero ni pa formula e norma di e presupuesto di Aruba. "Esey Aruba mes ta haci. Y pa esey, sr Tjon mes ta responsabel pe". 

CAFT CONTRA STATUUT

Bosman a sigui splica e portal aki cu e no ta comparti cu CAFT ta contra nos statuut. "Mi no ta comparti esaki, pasobra cada pais por implementa su propio supervision y cu e paisnan (Aruba y Hulanda) mes a bay di acuerdo cu ne. "Parlamento y gobierno di Aruba mes tabata presente eynan" Bosman a finalisa bisando.