20% di ‘Bursalen’ pa Hulanda no tin lugar di keda ainda

DEN HAAG / ORANJESTAD – Tin entre 20-25% di studiantenan cu ta yegando Hulanda e weekend aki for di Aruba, cu ainda no a sigura nan alohamento. Asina minister Plenipotenciario di Aruba na Hulanda Giulfred Besaril a confirma pa NoticiaCla diaranson mainta. Pero ta haciendo tur posibel pa remedia esaki. Ta depende unda e studiantenan ta studia, cu si nan lugar di alohamento ta regla. “Tin ciudadnan cu ta completamente cla pa ricibi e studiantenan, y tin cierto ciudadnan cu ta confrontando retonan” Besaril a bisa portal aki. E problema ta e demanda halto pa e ciudad cu e studiante kier studia. Mester remarca cu aña pasa caba NoticiaCla a raporta e posibilidad di scarsedad di camber pa e aña aki, den un raportahe special. 

EVITA LUGARNAN POPULAR

Por corda cu den pasado tabata alerta studiantenan y nan mayornan for di tempran, pa cuminsa busca lugar pasobra e ciudadnan popular ta hopi dificil pa haya lugar pa biba. Na juni ultimo, a bisa e departamentonan concerni na Aruba cu tin cu bay duna mucho mas informacion pa loke ta e escogencia di nos hobennan. “Pasobra si tur ta aglomera na lugarnan manera Rotterdam, Amsterdam, Utrecht y Groningen, e ta logico cu e cuater lugarnan aki ta bay tin problema pa pone tur studiante na un lugar adecuado pa por biba y studia” Besaril a bisa. A sigura cu tin hopi otro ciudad alternativo, y scol cu ta keda den lugarnan mas accesible y mas facil pa nan yega na acomodacion. “Pero si bo tin e informacion aki bo tin problema” e mandatario sigui bisa.

CUMINSA MAS TREMPAN

A bisa cu fin di aña lo bolbe hunto cu minister di Enseñansa Rudy Lampe, pa informa no solamente esnan den examen klas riba alohamento, sino bay te hasta mas tempran, unda cu por pensa e.o. riba klasnan den p.e H4, V5, EPI 3e jaar. Esaki pasobra segun Besaril, tin cierto ciudadnan manera Arnhem y Nijmegen, cu ta exigi bo inscribi pa un lugar di biba, for di 1 November. Pues si ta bin duna informacion na december na studiantenan, ya bo ta laat caba pa e lugarnan ey. “Ta dificil pa e ciudadnan aki haci excepcion pa nan” Besaril a sigui bisa. Pesey ta acentua riba informacion unda cu kier ataca esaki mas tempran pa alivia e studiantenan pa no haya problema cu alohamento.

AYUDO DI MENTOR Y POC

Pa yuda e grupo di studiantenan cu ainda no tin lugar pa keda, tin e grupo di mentor y POC (Plaatselijke Opvang Commissie) forma pa hobennan cu tin algun aña studiando aki caba, cu ta purba asisti. E lista concreto cu e studiantenan en cuestion ta wordo uza pa por aloca e studiantenan. Ta trahando 8 pa 12 ora tur dia pa remedia esaki, via entre otro makelaar pa evita cu ora cu december yega y ainda no tin lugar fiho pa biba, pa e ora tin cu bolbe Aruba pa motibo di falta di alohamento. “Ta haciendo humanamente loke ta posibel. E ta un reto grandi y ta pesey mi ta acentua atrobe cu informacion ta tur cos” Besaril a bisa.