Director di dept. Salud a gana caso contra minister Dangui Oduber

ORANJESTAD – Director di departamento di salud Jerry Staring a gana su caso contra minister di salud Dangui Oduber. Huez diabierna a kita e prohibicion di entrada na su trabou di e director di Departamento di Salud (DVG) Jerry Staring, manera impone dia 1 di juni ultimo. Esey kier men cu Staring por sigui funciona normal como director y no mester keda cas. Motivacion principal di huez ta cu gobierno no por a proba suficiente cu Staring su actuacion a perhudica e departamento, te pa mande cas pa e periodo di 6 siman. Minister di Salud Dangui Oduber den un declaracion cortico (lesa otro articulo) a bisa di ta desapunta cu e sentencia.

CASO

Durante tratamento di e caso, loke a resalta ta e forma con gobierno su abogado a hiba defensa y aki huez ta bisa repetidamente cu e defensa no tabata motiva suficiente e motibo pa cual a manda e director cas. Specificamente, segun huez, e decision ‘falta base legal, motibo exacto y e tempo mara na dje’. Ademas segun Departamento di Recurso Humano (DRH), tin duda riba e credibilidad di esnan cu a keha contra e director y e forma con esaki a bay. Y finalmente, segun un reaccion di DRH (cu a keda nunca a conseha riba e funcionamento specifico di e persona como director, te cu esaki por a conduci cu mester mande cas. Ademas ta mustra cu gobierno no a actua corecto den e proceso y no a motiva e motibonan presenta suficiente. De hecho, huez ta di opinion cu den un caso di profundidad (Bodemprocedure), e mesun punto lo keda presenta y como tal aki tambe e director lo por haya rason. Como tal a suspende e prohibicion na trabou pa e director. E director a argumenta cu e motibonan pa su prohibicion di entrada, ta motiva basa riba un vendetta personal, y no prestacion malo di trabou.

PROHIBICION DI TRABOU

Tabata luna pasa cu e director Staring a haya prohibicion di entrada, entrante 1 di juni ultimo, pa un periodo di 6 siman. E motibo ta cu tin iregularidadnan tumando lugar y kehonan contra e director cu mester a wordo investiga. Pa por a garantisa imparcialidad y tambe pa e director no stroba e investigacion, gobierno a dicidi di manda e director cas pa 6 siman. Lesa e sentencia AKI.